‘Tyd hardloop uit’ vir broer in berge vermis

Die soekgeselskap (Foto: Facebook/ Off Road Rescue Unit)

Daar is steeds geen spoor van Devereaux Pienaar (53), ’n ingenieur van Pretoria, nie nadat hy en sy broer Nico (47) verlede Dinsdag op ’n stap-ekskursie deur die Wolkberg-bergreeks in Limpopo gegaan het. Die familie van die twee broers, wat meer as ’n week gelede vermis geraak het, is dringend opsoek na nóg hulp en hulpbronne om verder na Devereaux te soek. Nico is vroeër vandeesweek lewend gevind.

Volgens Jean-Marie Bosch, die broers se susterskind, het dié ervare stappers beplan om vir twee dae in die berge te gaan stap voordat Nico weer oor die naweek sou terugkeer na eMalahleni (Witbank) waar hy weer Maandag vir werk moes aanmeld.

Dinge het egter skeefgeloop toe die broers op pad na Devil’s Knuckles besluit het om liefs terug te keer en mekaar toe verloor het. Toe familielede hulle nie op hul selfone in die hande kon kry nie, is ’n soekgeselskap na die twee broers ontplooi.

Die polisie asook verskeie spanne van Haenertsburg, Polokwane en Tzaneen is ingespan en daar is inderhaas met helikopters, voertuie en te voet onverpoos na die broers begin soek.

Bosch vertel dat Nico Maandagaand sy weg tot by ’n dam in die omgewing kon vind waar ’n taxibestuurder genaand Sydney hom begroet het. “Nico was in ’n slegte toestand. Hy was baie swak en deurmekaar,” vertel sy.

Nico het inderhaas mediese behandeling ontvang voordat hy vandeesweek saam met die soekgeselskap na sy ouboet begin soek het.

Louis Menge van die Tzaneen Search Rescue en Offroad Rescue Unit het Vrydagoggend bevestig dat die soektog na Devereaux voortduur.

Hoewel Menge vertel dat die hulp van die publiek en owerhede oorweldigend is, doen die familie nou ’n beroep op nóg ervare stappers, hommeltuigvlieëniers en lede van die publiek wat toegang tot 4×4-voertuie of helikopters het, om die soekgeselskap by te staan om Devereaux so gou moontlik op te spoor.

“Dit is ’n massiewe groot area en die tyd hardloop uit. Ons is egter vol hoop dat ons hom gaan kry,” vertel Bosch.

Menge het dit eens. “Ons is geweldig gedruk vir tyd.”

Daar word ook gevra vir onder meer kos, energiestafies en vrugte vir die soekgeselskap wat onverpoos na Devereaux soek.

Vir meer inligting rakende benodighede en waar dit geskenk kan word, lees hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
AB

Hoe verloor jy jou broer as julle saam stap? Maak nie sin nie! Sterkte, ek hoop hy word ongedeurd gevind!

Anni

Humor, iemand is weg en jy kwel jou oor die korrekte gebruik van Afrikaans. Swak van jou, uiters swak.

Woedend

Liewe genade hulle soek na n persoon en jy het n pyn oor “die tyd loop uit”. Magtig man dis n algemene stelling. Daars mense, en mense soos jy.

Balooba

Wat sou u klasifiseer as “goeie Afrikaans”? Gee n voorbeeld asseblief dat ons almal kan weet/verstaan wat u so kripties probeer deel.

Hoop my Afrikaans is aanvaarbaar?

Jan

Wat van snuffelhonde inspan ?