Uitblinker-matrikulant sterf tragies in ongeluk

Damian Gruen (Foto: Verskaf)

Medelye stroom in vir Damian (Duimpie) Gruen (18), ’n matriekleerder aan Hoërskool Die Anker in Brakpan, nadat hy Maandag vroegaand tragies in ’n motorongeluk omgekom het. Dit ’n dag na die skole weer vir matrikulante heropen het.

Cindy du Plessis, Damian se ma, vertel Damian was saam met sy ouer broer, Keenan Gruen (21), en suster, Amber Gruen (9), in die voertuig toe die ongeluk plaasgevind het. Keenan het die voertuig bestuur, terwyl Damian in die voorste passasiersitplek gesit het.

“Die kinders het by ’n rooi verkeerslig, so drie blokke van ons huis af, stilgehou. ’n Voertuig het skielik van agter teen hulle vasgejaag. My kinders se voertuig het gedraai en die voertuig is weer teen hulle vas. Dié keer het die voertuig die passasierskant van my kinders se voertuig getref, waar Damian gesit het,” vertel Du Plessis.

Volgens Du Plessis was die bestuurder van die ander voertuig glo besope en is op die toneel in hegtenis geneem.

Damian is op die ongelukstoneel oorlede.

Keenan het beserings aan sy nek en lae rug opgedoen en is hospitaal toe geneem vir verdere mediese behandeling. Amber is steeds in ’n kritieke toestand in ’n hospitaal in Pretoria.

Damian het op die skool se leerlingraad gedien. Hy het uitgeblink in akademie en was ’n kranige rugbyspeler. Hy het vir die skool se eerste rugbyspan gespeel.

Volgens Du Plessis was hulle besig om vir hom ’n beurs te soek om volgende jaar iets in rugby te gaan studeer.

’n Bewoë Du Plessis vertel Damian het baie vriende gehad en was geliefd onder al die leerders in die skool. “Hy was die nar van die huis en het altyd tyd gehad vir ’n grappie,” vertel sy.

Damian was ‘n kranige rugbyspeler (Foto: Verskaf)

Skole van reg oor die Oos-Rand het hul medelye op Facebook aan Damian se vriende en familie betuig.

“Ons innige meegevoel en simpatie aan Hoërskool Die Anker en gesin van Damian Gruen. Dit is vreeslik swaar en seer om te hoor dat iemand vir wie julle so lief is, so skielik van julle weggeneem is. Mag God julle in die moeilike hartseer tyd vertroos en versterk,” het Felicitas Skool in Brakpan op hul Facebook-blad geskryf.

’n Facebook-blad genaamd “In Loving Memory of Damian Gruen” is gestig waar vriende, familie en lede van die gemeenskap sy lewe kan vier deur herinneringe en foto’s te deel.

“Damian, woorde sal nie die seer kan beskryf wat almal nou het nadat ons die nuus van jou afsterwe ontvang het nie. Jy was so ongelooflike seun gewees met die mooiste maniere en so vol liefde. Jy was altyd bereid om te gesels,” lui een van die boodskappe.

Fondsinsamelingsinisiatiewe is van stapel gestuur om genoeg fondse in te samel om die familie met begrafniskoste en mediese uitgawes te help. Die familie het glo nie ’n mediese fonds nie.

Leoni Raat, ’n besorgde ma, het ʼn Back-a-Buddy-fondsinsameling gestig om geld vir die familie in te samel. “Die familie rou en moet nie nou met finansiële stres belas word nie,” sê Raat.

Besoek die Back-a-Buddy-blad hier. Bankbesonderhede vir donasies kan ook op die “In Loving Memory of Damian Gruen”-Facebookblad gekry word.