Uiters ‘streng Covid-maatreëls’ by Rage-feeste

Plett Rage. (Foto: Plett Rage Offical/Instagram)

Al die matrikulante wat van plan is om vandeesweek na die Plett Rage-byeenkoms in die Oos-Kaap op te ruk, moet gedeeltelik of ten volle ingeënt wees voor hulle by die hekke van dié bekende matriekvakansiefees sal mag ingaan.

Hiermee saam sal matrikulante ʼn negatiewe PCR-toets moet inhandig en deur die loop van die fees verskeie Covid-19-toetse moet ondergaan.

Plett Rage skop Vrydag af en duur tot Dinsdag.

Ronen Klugman, organiseerder van dié Rage-byeenkoms, het Dinsdag aan Maroela Media gesê dat hulle vanjaar van die strengste Covid-19-maatreëls wat ʼn Suid-Afrikaanse fees nóg gesien het, vir die byeenkoms ingestel het.

“Dit is die eerste feesbyeenkoms van sy soort in Suid-Afrika wat inentingsertifikate en ʼn reeks ander dokumente verpligtend maak,” sê hy.

“Voor die matrikulante by hul huise vertrek, moet hulle ʼn PCR-toets laat doen en die negatiewe uitslag as bewys saamneem. Ons wil weet wat die stand van sake is nog voor die leerders by die byeenkoms aankom; sodoende kan diegene wat saam met hulle vertrek ook beskerm word.”

Die matrieks sal ʼn vinnige antigeentoets moet doen voordat hulle by die hekke mag ingaan en sal daarna weer etlike kere getoets word, na gelang van enige moontlike infeksie onder feesgangers.

Volgens Ballito Rage in KwaZulu-Natal se sosialemediaplatforms beplan organiseerders van dié byeenkoms om soortgelyke maatreëls in te stel. Die fees begin Dinsdag en duur tot Sondag.

Klugman sê al die personeel en feeskunstenaars sal dieselfde prosedures moet volg om te verseker dat daar nie ʼn enkele virusgeval by die geleentheid is nie. Boonop word die fees in die buitelug gehou.

Kommer oor dié reeks feeste het opnuut opgevlam nadat die nuwe Covid-19-variant genaamd Omikron sy kop in Suid-Afrika uitgesteek het. Dit volg ook nadat verlede jaar se Ballito Rage as ʼn superverspreider-byeenkoms bestempel is toe byna 1 000 van die feesgangers positief vir Covid-19 getoets het.

Pres. Cyril Ramaphosa het ook lede van die publiek aangeraai om groot partytjies en ander byeenkomste liefs uit te stel, maar het nog geen nuwe inperkingsregulasies aangekondig nie.

Hoewel Plett Rage verlede jaar uitgestel en toe eindelik afgestel is, het Klugman lede van die publiek verseker dat slegs 900 matrikulante by vanjaar se fees sal wees. Vorige jare is meer as 5 000 kaartjies verkoop.

“Ons het nog verder gegaan en aangebied om gratis Covid-19-toetse by ʼn aantal kuierplekke te doen waar daar moontlik ander mense buiten ons feesgangers gaan kuier,” sê hy.

“Ons het ook ʼn aantal peilings gedoen onder diegene wat die fees gaan bywoon en bevind dat die oorgrote meerderheid van die matrieks se ouers en grootouers reeds teen die virus ingeënt is.”

Plett Rage het egter heelwat minder kaartjieverkope van veral Pretoria en Bloemfontein gesien, wat gewoonlik een van hul grootste markte is.

“Diegene wat nie ingeënt wil word nie, kan bloot nie die fees bywoon nie en dit wys in die gebiede waar kaartjieverkope veral sleg gevaar het,” sê hy.

“Ons hoop om die weg te baan vir nog baie geleenthede soos dié waar breedvoerige stappe gedoen word om almal se veiligheid te verseker.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

30 Kommentare

jongste oudste gewildste
Samuel

Wat ‘n klug!! Wie gaan toesien dat alle reëls en regulasies nagekom word?? Sulke fuifpartytjies word toegelaat, maar kerke word toegemaak.

Geld praat baie hard hier.

Anel

En so spaar baie ouers geld.

VaalDonkie

Het hulle al ooit in hul lewens ‘n tiener ontmoet?

Nicolaas

So wie betaal vir al die toetse wat gevat moet word? Want niks in die wereld is gratis nie.
Toets 1: Voor die matrikulante by hul huise vertrek, moet hulle ʼn PCR-toets laat doen (R900)
Toets 2: Die matrieks sal ʼn vinnige antigeentoets moet doen voordat hulle by die hekke mag ingaan (R350)
Toets 3: daarna weer etlike kere getoets word, na gelang van enige moontlike infeksie onder feesgangers. (R350 of R900)
Maak die som per persoon…

Blikkies

Asof toetse die probleem gaan wegvat. Jy is nie eers gewaarborg met al jou inspuitings nie. Dit is ‘n Grap en net nog ‘n super verspreiding byeenkoms. Of daar nou 500 / 900 of 5000 is. Groot fout.