Uitgewer versoek om Zuma-boek te onttrek

Omslag van die boek (NB Uitgewers)

Die Staatsveiligheidsagentskap (SVA) het NB Uitgewers versoek om Jacques Pauw se boek The President’s Keepers te onttrek en sekere dele van die boek te verwyder.

NB Uitgewers het in ʼn verklaring gesê die SVA se regsverteenwoordigers dreig voorts om hof toe te gaan om ʼn interdik te bekom wat NB verhoed om die boek verder te druk, versprei of te bemark.

Die SVA voer aan dat daar inligting in die boek is wat strydig is met die Wet op die Intelligensiediens en dat daar talle onakkuraathede in die boek is.

“Aangesien ons kliënt grondwetlik verplig is om die veiligheid van die staat te verseker en die identiteit van sy lede en agente te beskerm, is daar ook ʼn verpligting om op te tree in gevalle waar sodanige sekuriteit geskend word deur die openbaarmaking van sy wettige operasionele metodes, geklassifiseerde dokumente sowel as die identiteit van sy agente,” lui die brief wat aan NB Uitgewers gestuur is.

Pauw se boek is op 29 Oktober gepubliseer en onthul hoe belastingbetalersgeld ter waarde van miljoene rande glo in die bankrekeninge van valse spioene ingevloei het en dat pres. Jacob Zuma ’n “salaris” van R1 miljoen per jaar van ’n omstrede tendermagnaat ontvang het sonder om dit aan die Suid-Afrikaanse Inkomstediens (SAID) te verklaar.

NB Uitgewers sê hy ondersteun Pauw se boek en sy regsverteenwoordigers sal op die SVA se brief reageer.

Maroela Media het vroeër berig die SAID oorweeg dit om regstappe te doen teen Pauw en die Sunday Times.

Sandile Memela, woordvoerder van die SAID, het gesê hy is baie bekommerd oor die publisering van vertroulike inligting rakende belastingbetalers wat strydig is met die Wet op Belastingadministrasie. Volgens Memela verbied die wet die openbaarmaking van belastingbetalers se inligting deur ’n SAID-beampte of ’n voormalige SAID-beampte.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

28 Kommentare

jongste oudste gewildste
Mielie

Hoekom is dit n kwessie van staatsveiligheid?. Almal weet wasr die man woon. Hoe word sy veiligheid bedreig. Hy het meeryfwagte as Trump en Malema…..Ek dink hy was verneder in parlement gister. Hy het teen teen een gelieg en as dit wel uitkom dan word bly dit nie meer 783 nie…..

marous

As iemand die boek gelees het , gaan hulle sekerlik vir die mense ‘n liter tippex maak drink….of ‘n uitveer gee om te eet.

Leahim

Vryheid van spraak as die feite korrek is kan hulle gaan vlieg versprei die boek ook in oorsese lande

Eish

Net een woord omskryf die situasie, OPENBARE BELANG.
Dit is verblydend dat die uitgewer hom by die skrywer skaar, des te meer aanduidend waar die waarheid hom straks bevind.

Fiela

Gaan vandag nog daai boek koop. Alles wil mos toegesmeer word rakende die land se Nr. 1 skelm.