Uitspraak gelewer ná uitlatings oor wit mense

Velaphi Khumalo. Foto: Via Facebook

Die gelykheidshof het uitspraak gelewer in die saak teen Velaphi Khumalo, die man wat gesê het die land moet van wit mense gereinig word nes Adolf Hitler met die Jode gemaak het.

Die hof het die saak in Julie aangehoor en uitspraak is voorbehou. Regter Roland Sutherland het Vrydag sy uitspraak gelewer en beslis dat Khumalo se uitlatings haatspraak is ingevolge artikel 10 (1) van die Gelykheidswet en dat Khumalo verbied word om weer dié uitlatings te maak.

Sutherland het verder beslis dat Khumalo enige verwysigings na sy uitlatings van alle sosialemediaplatforms moet verwyder indien hy dit nog nie gedoen het nie. Khumalo moet ook binne 30 dae ʼn geskrewe verskoning publiseer wat aan alle Suid-Afrikaners gerig is en waarin hy bevestig dat sy uitlatings haatspraak was, dat dit verkeerd was en dat hy dit nie weer sal doen nie.

velaphi-khumalo-facebook-post

‘n Skermskoot van Velaphi Vel-hova Khumalo se Facebook-kommentaar. Foto: Verskaf

Sutherland het ook gelas dat ʼn afskrif van die dossier en sy uitspraak aan die nasionale direkteur van openbare vervolging gestuur word om te besluit of Khumalo strafregtelik vervolg moet word. Khumalo is ook beveel om die Menseregtekommissie (MRK) se regskoste in die saak te betaal.

Die ANC het Khumalo reeds in 2016 voor die gelykheidshof gedaag vir haatspraak en onbillike diskriminasie. Khumalo is gevolglik ʼn boete van R30 000 opgelê en moes gemeenskapsdiens verrig. Die MRK het egter gevoel dié straf is nie swaar genoeg nie, waarna die kommissie Khumalo weer voor die gelykheidshof gedaag het.

‘n Skermskoot van Velaphi Vel-hova Khumalo se Facebook-kommentaar. Foto: Verskaf

Khumalo het in Januarie 2016 in reaksie op die Penny Sparrow-debakel op sy Facebook-blad gesê dat hy “die land van wit mense wil reinig” en dat daar teen wit mense opgetree moet word soos Adolf Hitler met die Jode gemaak het. Hy het in ’n tweede inskrywing op Facebook gesê wit mense in Suid-Afrika verdien om soos Jode opgekap en doodgemaak te word.

Die MRK het versoek dat Khumalo se uitlatings as haatspraak verklaar word en hy onvoorwaardelik om verskoning moet vra. Die MRK het ook versoek dat Khumalo skadevergoeding van minstens R150 000 moet betaal wat aan ʼn instansie geskenk sal word wat versoening en sosiale samewerking bevorder.

Sutherland het egter gelas dat daar reeds ʼn vergoedingsbevel (die R30 000) teen Khumalo gemaak is en dat dit onvanpas is om nog ʼn bevel in die verband uit te reik. Sutherland meen geregtigheid geskied egter in die geval aangesien Khumalo die MRK se regskoste moet betaal aangesien die MRK deur belastingbetalers gefinansier word.

Khumalo werk steeds vir die departement van sport, kuns, kultuur en ontspanning, en het ná ʼn interne ondersoek oor die aangeleentheid deur die departement ʼn finale geskrewe waarskuwing ontvang.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
Anoniem

Tronk toe met jou .

van der Merwe

Dubbele standaarde . . .

Jaco Jacobs

Hierdie sisteem is ‘n grap!!! Regtig as dit ‘n blanke persoon was is dit reguit tronk toe,nou omdat dit ‘n nie blanke man is moet daar net ‘n briefie geskryf word

SA is 'n Grap

Lekker SA!! Net as jy wit is kry jy tronkstraf maar as jy ‘n ander ras is moet jy net omverskoning vra. Wraggies pateties!!!

Chantall

Dis lekker so hy kom weg met n tik op die vingers? Stem saam dubbel-standaard