Uitspraak voorbehou in Medihelp-saak

Kelly du Plessis, uitvoerende hoof van RDSA saam met Zachary se ouers, Michaney en Jacques de Wet. (Foto: Verskaf)

Uitspraak is Dinsdag in die Pretoriase hooggeregshof voorbehou in die saak tussen Medihelp en Rare Diseases South Africa (RDSA) rakende die behandeling van ʼn kleuter met ʼn seldsame siekte.

Die regter sal na verwagting teen die einde van die week uitspraak lewer, of redes verskaf waarom uitspraak nie onmiddellik gelewer kan word nie.

Die kleuter Zachary se ma, Michaney de Wet, het Dinsdag aan Maroela Media gesê hulle is optimisties oor die uitspraak, hoewel dit moeilik was om in die hof te sit en na sommige van die teenargumente te luister.

“Ons is baie dankbaar dat die regter wel ons saak aangehoor het – daar was natuurlik ʼn kans dat dit uitgegooi kon word. Ons hoop, glo en vertrou vir die beste.”

Zachary ontvang tans geen behandeling nie aangesien die behandeling ongeveer R185 000 per maand kos.

De Wet sê haar seuntjie se gesondheid is maar “op en af”, hoewel hy nie regtig besef wat fout is nie.

“Hy is ʼn happy go lucky-kind.”

Maroela Media het vroeër berig dat Medihelp ʼn dringende hofaansoek teenstaan wat deur RDSA ingedien is om die fonds te dwing om Zachary de Wet (3) se medikasie, Elaprase, te betaal, wat nodig is om sy toestand as deel van minimum voorgeskrewe voordele (VMV) te behandel. Zachary ly aan mukopolisakkaridose‑tipe 2, ook bekend as Hunter‑sindroom.

Zachary de Wet is verlede jaar met mukopolisakkaridose‑tipe 2, ook bekend as Hunter‑sindroom, gediagnoseer. (Foto: Verskaf)

Die meeste kinders by wie dié siekte gediagnoseer is, sal tussen die ouderdom van 12 en 18 sterf indien hulle nie behandeling ontvang nie.

RDSA se regspan het voorheen gesê hoewel Medihelp toegegee het dat dié sindroom ʼn VMV-toestand is, die mediese fonds aanvoer dat die behandeling daarvan met Elaprase (ensiemvervangingsbehandeling) nie ʼn VMV-voordeelmedikasie is nie. Hulle keur wel palliatiewe sorg goed.

RDSA se argument is egter dat Elaprase die enigste geregistreerde behandeling vir Hunter-sindroom is – dus is dit ʼn goedgekeurde, voorgeskrewe VMV-voordeelmedikasie.

Weens die sindroom het Zachary slaapprobleme, twee lekkende hartkleppe en ʼn vergrote lewer. Sy ma sê hy kry ook dikwels longinfeksies.

Hunter-sindroom beïnvloed ook Zachary se kognitiewe vermoë, en volgens De Wet is hy as gevolg daarvan agter met die mylpale wat hy in ooreenstemming met sy ouderdom moet behaal.

“Die uitwerking van die sindroom wys reeds, maar hy is nietemin so ʼn wonderlike seuntjie.”

De Wet sê die moeilike ding is dat hulle weet sy liggaam word deur die sindroom afgetakel, maar dat hul hande “heeltemal afgekap is”.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

13 Kommentare

Hennie ·

Om te dink dat jy jou mediese fonds hof toe moet skerp om te help… Sal nooit ooit aan hulle wil behoort nie!

Cola ·

Ek is nee ons hele familie is by Medihelp en ek hou die situasie met valkoe dop

KatjieDeKat ·

Maak nie saak nie!! Dink hoeveel die inkomste van enige gegewe mediese fonds is, en daar is soveel mense wat die fondse betaal net Ingeval hul dit ooit nodig kry. Baie van hulle gaan nie eens een keer n jaar dokter toe of hospitaal toe nie. Die fonds Kan dit bekostig! As jy jou wil uitgee as n toffie gaan sommige mense jou kou. As jy jou wil uitgee as n mediese fonds moet jy soms BETAAL vir die diens wat jy adverteer. Anders is dit BEDROG, plein en simpel!!

Jacques ·

Hier is my probleem…. wat maak dat daai medisyne so duur moet wees? Iemand maak ‘n klomp geld ten koste van…

AN ·

VMVs word nie deur skemas bepaal nie, skemas kan nie self besluit of dit ‘n VMV nie. Skemas kan net optree binne die riglynne van die Raad op Mediese Skemas. Waarom word daar nie meer klem op die kostes van medikasie in ons land nie?

SjN ·

Hou in gedagte dat die reels en voorskrifte voorgeskryf word deur die Raad van mediese skemas en nie deur die fonds self nie, hofbeslissing gaan interesant wees.

Marius ·

Ek wil net weet wat sou gebeur het as dit een van die fonds mense se kinders was , sou hulle ook dan so aangegaan het? As dit my kind was het ek hulle aangekla vir poging tot moord. Baie sterkte aan die seun en sy ouers.

Veronika ·

Hoekom is die medisyne so duur? Is dit regtig nodig dat dit so duur is? Dis mos nie reg nie!!

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.