Uitstuur van SMS’e oor plasing van leerders by sommige skole nou uitgestel

onderwys-skool-skole-onderrig-argieffoto

(Foto: Element5 Digital/Unsplash.com)

Die departement van onderwys gaan wél Woensdag voort met die uitstuur van SMS’e oor voornemende graad 1- en graad 8-leerders se plasings in skole – die skole van waar klagtes ontvang is, se SMS’e word egter teruggehou.

Maroela Media het vroeër berig AfriForum en die Skoleondersteuningsentrum (SOS) het die Gautengse departement van onderwys in ’n prokureursbrief gevra om die uitstuur van kennisgewings oor skoleplasings tot 16 Oktober 2019 uit te stel. Dié kennisgewings word per SMS aan ouers van voornemende graad 1- en graad 8-leerders gestuur.

Die organisasies sê verskeie skole en beheerliggame het hulle oor die plasings om hulp genader. Hulle meen daar is talle teenstrydighede en onreëlmatighede in die plasingslyste wat die departement aan hulle voorsien het.

Sommige mense sê selfs dat die probleme reeds verskeie kere onder die departement se aandag gebring is, maar dat sogenaamde hersiene lyste weer dieselfde, of nuwe probleme ingesluit het.

AfriForum en die SOS het in vandag (Dinsdag) se skrywe die departement tot die einde van die werksdag gegun om te reageer. Indien hulle teen dan geen reaksie of bevestiging van uitstel gekry het nie, sou hulle die dringende hof vra om die uitstuur van die inligting te verhoed totdat die probleme uitgestryk is.

Die departement het vroeg Dinsdagaand in ʼn brief gesê hy beskou die situasie in ʼn baie ernstige lig en dat die SMS’e vir plasing by die 12 skole – soos genoem in AfriForum en die SOS se brief – tydelik teruggehou gaan word.

“Die tydelike opskorting van die plasingsproses beteken die departement gaan môre SMS’e aan ouers stuur, maar nie aan ouers van dié wat in die brief genoem word of skole met soortgelyke probleme nie. SMS’e aan dié skole gaan eers gestuur word wanneer die departement tevrede is dat die probleme uitgestryk is.”

Die departement het onderneem om teen Donderdag verdere terugvoer te gee.

Carien Bloem, AfriForum se bestuurder vir onderwys, het die stap verwelkom, maar sê die situasie gaan waarskynlik steeds tot verwarring onder sommige ouers lei as hulle nié môre die plasings-SMS’e kry soos verwag nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Shaun

” sal hulle die dringende hof vra”. Julle bedoel seker AfriForum en SOS sal n ” Dringende aansoek voor die hof bring”? Daar bestaan nie n dringende hof nie. Net dringende aansoeke.

hannelie

Ek kan nie meer die gewag vat nie. My senuwees is klaar en elke keer as ek dink ok ons hoor more dan sien ek dat daar op 99.9 uit gestel is. Weet hierdie mense wat dit aan ons ouers doen wat so sit en wag en ons dood stress. Kry die dekselse proses reg en laat weet ons wat gaan aan.

PIJ

Ag nee regtig Shaun. Jy mis alweer die punt

Lola

Dit sal natuurlik ook baie help as hulle vir ons kan sê watter skole die probleme het?

Johan Neuteman

Dis moeilik vir gesinne: vasgevang tussen goedkoper staatskool maar vyandige/ondoeltreffende staat dikteer aan die een kant, en duurder privaatskool aan die ander kant; maar daardie privaatskole wat hulle eie sake reël – jy doen aansoek en kry ‘n antwoord, klaar – en wat die gemeenskap en nie die politiek nie, dien, word ‘n beter opsie.