Unisa gʼn ‘kwalifikasiefabriek’ – studenteraad

Die Unisa-kampus in Pretoria. (Foto: Gauteng-toerisme)

Unisa se nasionale studenteraad sê hy neem met “afsku” kennis van berigte wat die integriteit van dié universiteit se kwalifikasies diskrediteer en die harde werk van die universiteit se studente tot niks reduseer nie.

Maroela Media het vroeër berig ʼn verslag deur ʼn ministeriële taakspan wat die minister van hoër onderwys en opleiding, Blade Nzimande, aangestel het om ʼn onafhanklike hersiening van Unisa te doen, het verdoemende bevindings oor die stand van sake by die universiteit gedoen.

Luidens die verslag is daar ʼn netwerk van korrupsie wat gelei het tot institusionele kaping.

Die taakspan het onder meer ook aanbeveel dat Nzimande ʼn administrateur vir ʼn tydperk van twee jaar aanstel en dat die universiteitsraad ontbind word.

Die studenteraad het teruggekap en sê hy verwerp die “ongegronde bewerings en is bekommerd oor die georganiseerde, doelbewuste aanval op die standaard van kwalifikasies by die universiteit”.

Die studenteraad sê die berigte is daarop gemik om die universiteit te ondermyn en Unisa uit te beeld as ʼn “rigtinglose onderrigruimte” wat ineengestort het.

Volgens die studenteraad is Unisa besig met die bou van ʼn nuwe sakemodel wat beleggers en skenkers gaan lok en wat die universiteit in staat sal stel om studente finansieel te ondersteun, veral dié wat uit armer huishoudings kom.

“Unisa-studente is van die hardwerkendste en hulle werk deurlopend hard om hul kwalifikasies te behaal. Die mediaberigte wat die universiteit afmaak as ʼn kwalifikasiefabriek minag die harde werk van Unisa-studente.

“Die media is besig met ʼn direkte veldtog om die kwalifikasies van die universiteit te diskrediteer, Unisa-gegradueerdes tot ʼn standaard van niks te reduseer nie en die transformasiewerk van die universiteit af te maak.”

Hulle sê voorts gegradueerdes van alle universiteite sukkel om werk te vind en dat die probleem veel wyer as net Unisa is.

Kwalifikasies word deur die Raad op Hoër Onderwys geakkrediteer en alle kwalifikasies word by die Suid-Afrikaanse Kwalifikasieowerheid (SAQA) geregistreer. Die studenteraad sê Unisa lewer die grootste getal gegradueerdes en meer as 30% van onderwysers bekwaam hulle daar. Unisa is volgens hulle die universiteit met die laagste studiegeld en die studenteraad waarsku teen die sogenaamde pogings om die universiteit in ʼn slegte lig te stel.

“Ons sien die seksistiese, rassistiese en klassistiese aanvalle as doelbewuste pogings om die kwalifikasies van Unisa te diskrediteer.”

Die studenteraad sê hy beywer hom ook om te verseker dat geregistreerde studente maandelikse data ontvang om te studeer, dat fisieke gradueringseremonies weer ingestel word en dat alle Unisa-kampusse ten volle funksioneer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

45 Kommentare

jongste oudste gewildste
pestilensie

Skrif was aan die muur toe Malema sy graad daar verwerf

Jaada

Interresant dat die rasse kaart gespeel word sodra hulle vasgevat word vir “poor performance” By my werk het ‘n swart bestuuderes by my gekla dat hulle se sy is ‘n rassis omdat sy een aangespreek het vir sy swak werk.

marius

Ook geen korrupte staats amptenarre of kaders in die hool nie . Alles is piekfyn .

Hennie

Studente raad? Kan mens die goed studente noem? Wat ‘n spektakel maak die goed nie van hulself nie. Destyds toe liewe heksie nog “in” was, het ek nie gedink gifappeltjies is so skadelik nie, maar nou weet ek! Gelukkig studeer ek nie by UNISA nie! Ek sou myself dood skaam!

quartus

Die nuwe UNISA is lankal nie meer vergelykbaar met die ou UNISA nie.