UV-besluit oor MT Steyn-standbeeld ‘kortsigtig’

Foto: UV

AfriForum Jeug meen die verskuiwing van die MT Steyn-standbeeld laat die vraag ontstaan oor of Afrikanerstudente nog by die Universiteit van die Vrystaat (UV) welkom is.

Maroela Media het vroeër berig die UV het Vrydag besluit die standbeeld moet van die Bloemfontein-kampus geskuif word.

Volgens AfriForum Jeug sal die standbeeld na die Oorlogsmuseum, langs die Vrouemonument, in Bloemfontein verskuif word. Dít is ook waar Steyn ter ruste gelê is.

AfriForum Jeug is van mening dat die standbeeld hier die nodige erkenning en respek sal ontvang wat dit toekom en is dankbaar vir die bewaring daarvan, asook dat die Steyn-familie se wense in ag geneem is in die verskuiwingsproses.

AfriForum Jeug is egter van mening dat die besluit om die standbeeld te skuif kulturele polarisasie op die kampus kan vererger.

“Die UV hou voor dat hulle besluit om die standbeeld te skuif gemotiveer word deur ’n inisiatief deur kampusbestuur om ’n omgeekultuur op kampus te skep waar studente moet omgee vir mekaar se geskiedenis en erfenis,” het Ohann Fourie, AfriForum Jeug se nasionale koördineerder vir kampusstrukture, gesê.

“Die werklikheid is egter dat die UV met hierdie skuif ’n presedent skep en juis nie wedersydse erkenning en respek vir verskillende kulture bevorder nie, maar eerder ’n spesifiek geteikende erfenis verwyder.

“Om ’n projek van omgee vir mekaar se geskiedenis en erfenis van stapel te stuur deur ’n groep van jou studente se erfenis van die kampus te verwyder, weerspreek duidelik die bedoeling van só ’n projek en laat die vraag ontstaan of die UV dan net vir sekere studente se erfenis en geskiedenis omgee en nie vir ander s’n nie,” sê Fourie.

“AfriForum Jeug is baie bekommerd dat hierdie projek meer omgee vir sekere groepe studente as vir ander en daarom verdeeldheid onder studente kan veroorsaak en nie die jeug sal leer om ten spyte van hulle verskille steeds respek vir mekaar te hê nie,” sluit Fourie af.

Steyn was van 1896 tot 1902 die president van die voorheen onafhanklike Oranje-Vrystaat. Verskeie geboue en strate in die Rosestad is na Steyn vernoem.

Die voormalige CR Swart-gebou, die Vrystaatse regering se provinsiale hoofkantoor, is in 2015 ter nagedagtenis aan die ontslape Kubaanse leier, Fidel Castro, hernoem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Jewel

Lank gelede was Vista Universiteit Engels, vir swart studente. Kovsies was Afrikaans, vir wit studente. Nou is die University of the Free State (of UFsies) Engels, vir swart studente. Wat hulle in die eerste plek gehad het….

Neels

So word ons geskiedenis uit rangeer. Daar moet nou seker plek gemaak word vir een van die struggle ikone. Kyk maar wie se standbeeld gaan binne die volgende jaar of wat daar verruis

Henk du Toit

Omgee kultuur!!? Rerig?! die UV maak ‘n helse woordefout hier dit is nie ‘n omgee kultuur nie dit is n Toegee kultuur waar van die Afrikaner verwag word om toe te gee en toe te gee en toe tee gee Nou toe oubaas se ou dwaalgeeste wys nou vir ons klomp ”kolonialiste” wat julle gaan oopsit in Pres MTSteyn se plek!

Jerry

AfriForum jeug om nie welkom te voel nie omdat julle geskiedenis en kultuur uitgesluit word dien mos nou as regverdiging om afsonderlik te ontwikkel. Begin julle eie universiteit in die Vrystaat wat ander kulture uitsluit en skuif die beeld soontoe! Doen aan hulle wat hulle aan julle doen! Hulle wys hulle wil graag afsonderlik ontwikkel en witmense uitsluit, dit is genoeg regverdiging vir eie afsonderlike ontwikkelling.

Andre

Ek dink dit sal rustiger vir hom wees by die Oorlog museum eerder as om tussen n klomp te staan wat in elk geval nie weet hoekom die standbeeld daar is nie. Ek moes mooi dink om dit so te stel om nie “gevoelens” seer te maak nie.