UV-rugby-bakleiery: ‘Aanklagte teen studente ongrondwetlik’

Tydens die wedstryd op Shimla-park op 22 Februarie 2016. Foto: Twitter via @UFS_SRC

Tydens die wedstryd op Shimla-park op 22 Februarie 2016. Foto: Twitter via @UFS_SRC

Briewe wat deur die Universiteit van die Vrystaat (UV) aan verskeie studente gestuur is waarin hulle voor ʼn dissiplinêre komitee gedaag word rakende die voorval vroeër vanjaar toe betogers tydens ʼn rugbywedstryd op Shimlapark in Bloemfontein op die veld gestorm het, is Woensdag as “ongrondwetlik” bestempel.

Maroela Media het vroeër berig talle studente het ʼn brief van die UV ontvang waarin daar geskryf word dat die student “skuldig bevind is” aan sekere aanklagte, soos aanranding met die doel om ernstig te beseer, openbare geweld en die beskadiging van die UV se goeie beeld. Die aanklagte hou verband met ʼn voorval in Februarie vanjaar toe betogers tydens ʼn rugbywedstryd op die kampus op die veld gehardloop het en ʼn vuisgeveg glo uitgebreek het.

Die studente is versoek om Vrydagmiddag by ʼn hotel in Bloemfontein hul dissiplinêre verhoor by te woon.

Morné Mostert, nasionale projekkoördineerder van AfriForum-Jeug, het Woensdag aan Maroela Media gesê dit is verregaande dat die bewoording in die briewe aan die studente daarop dui dat die student reeds skuldig bevind is en bloot die geleentheid gegee word om sy onskuld voor ʼn dissiplinêre komitee te bewys. “Hoe kan die universiteit sommer net besluit dat die studente skuldig is nog voor hulle ʼn kans gekry het om hulself te verdedig? Dit is verregaande.”

Mostert het ook gesê dat daar in die UV se reëls oor studentedissipline aangedui word dat studente ten minste vyf werkdae kennis moet ontvang voordat hy of sy voor ʼn dissiplinêre komitee moet verskyn. “Hierdie studente het gister [Dinsdag] gehoor dat hulle Vrydag moet verskyn. Hulle word nie genoegsame geleentheid gegun om hulself vir die verhoor voor te berei en bewyse in te samel om hul onskuld te bewys nie. Die universiteit gee dus nie aan hierdie studente ʼn billike verhoor nie en dit is nie net teen die UV se eie beleid nie, maar ook ongrondwetlik,” het hy gesê.

Intussen het Gys Macdonald, ʼn pa van een van die studente wat voor ʼn dissiplinêre komitee geroep is in verband met die voorval, aan Maroela Media gesê hy is woedend oor die universiteit se optrede en het reeds regsadvies in die verband ingewin.

“Ek het kort nadat my kind my oor die brief gebel het self telefonies met die universiteit se prokureur gepraat,” het Macdonald gesê. “Hy beweer hulle het beeldmateriaal waarop daar gesien kan word hoe my seun iemand aanrand. Intussen was my seun daardie aand by sy koshuis [wat nie op die kampus is nie] besig om te studeer. Hy kan dit bewys ook.”

Macdonald het verduidelik dat sy seun, ʼn BSc Landbou-student, vroeër die betrokke dag op kampus was, maar net na 18:00 weer by die kampus se hek uit is deur sy studentekaart te skandeer. “Die universiteit se toegangbeheerstelsel behoort dus te kan wys dat hy reeds van die kampus af was toe die voorval by Shimlapark plaasgevind het. Ek het dit vir die prokureur probeer verduidelik, maar hy het volgehou dat my seun reeds ‘100% positief’ as een van die skuldiges geïdentifiseer is. Ek het vandag ʼn prokureur gesien en ek sal hierdie saak beslis nie hier laat nie. Ek is woedend.”

Volgens Macdonald het een van sy seun se koshuismaats ook ʼn soortgelyke brief ontvang. Dié student was ten tyde van die voorval in Pretoria.

Maroela Media het die UV Dinsdag en Woensdag om kommentaar genader, onder meer om uit te vind hoe die aangeklaagde studente geïdentifiseer is en hoeveel studente gedaag is om voor ʼn dissiplinêre komitee te verskyn. Lacea Loader, woordvoerder van die universiteit, het gesê dat ʼn verklaring oor die saak uitgereik sal word. Teen Woensdagaand was daar nog nie ʼn verklaring beskikbaar nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Sharon Anderson

Tragies!!!! Die heinings wat afgebreuk word en die dame wat id gesig geslaan is mag mos geen uitwerking op die seuns hê nie. Maar laat hulle net aan een van hulle vat!!! Maak my boos!!!!

Roger

Laat ek raai, al die studente wat briewe ontvang het is blank. ‘n Minder subtiele poging van ‘n rassistiese bestuur om wit studente te intimideer.

saarkie

Uv jul maak jul naam net nog meer gat!!!

HEVW

Dit laat mens stom. Tipiese optrede van n onontwikkelde derdewereld Afrika land,

Meneer

#JansenMustFall