UV-video: EFF sê studente ‘is uitgelok’

‘n Skermskoot uit die video.

Die EFF-studentekommando (EFFSC) aan die Universiteit van die Vrystaat (UV) sê EFF-studente wat Dinsdagmiddag ʼn personeellid op die universiteit se Bloemfontein-kampus aangerand het, was “uitgelok” om dit te doen.

ʼn Video van die voorval toe ʼn gestoei tussen die personeellid en betogende studente op die trappe van ʼn kampusgebou ontstaan het en die personeellid grond toe geruk is, het sedert gister opslae op sosiale media gemaak. Maroela Media het vroeër berig AfriForum Jeug het ná die voorval ʼn klagte teen die EFFSC by die UV ingedien.

Die EFF-studentekommando het in ʼn verklaring wat hy na aanleiding van gister se betoging uitgereik het, nie die voorval ontken nie, maar was blatant onapologeties daaroor. “Die personeellid betrokke by die kwessie is verantwoordelik vir die gewelddadige interaksie wat op die verskeie video’s in die openbare domein gesien kan word. In hierdie rekords [sic], kan gesien word hoe hy die geweld uitlok deur hardhandig deur ʼn groep vreedsame studente te stamp in ʼn poging om hulle om te stamp, en die studente het met geweld gereageer in ʼn poging om hulself teen die oortreder te verdedig,” lui die verklaring.

“Die EFFSC is onapologeties oor ons ondersteuning van die studente se betoging en moedig studente wat [deur die betrokke kwessies] geraak en nié geraak word nie aan om die betoging tot die einde deur te sien. Oorwinning is ʼn sekerheid.”

‘n Skermskoot uit die video.

Die betogende studente se ontevredenheid spruit uit finansiering van die nasionale finansiële hulpskema vir studente (NSFAS). Lacea Loader, direkteur van kommunikasie en bemarking aan die UV, het aan Maroela Media gesê die studente dring daarop aan dat die universiteit onmiddellik NSFAS-toelae aan hulle betaal.

“Die universiteit het vroeër vanjaar met die Studenteraad van die Bloemfontein-kampus ooreengekom dat studente gedurende die eerste week van elke maand betaal sal word. Gister het studente geëis dat toelae wat bedoel is om in die eerste week van Junie betaal te word, onmiddellik betaal word. Die toelae vir Mei is reeds in die eerste week van Mei betaal,” verduidelik Loader.

“Die universiteit se bestuur sal poog om met die studente in gesprek te tree om enige verdere kwessies rakende NSFAS uit te sorteer.”

Loader sê die aanranding van die personeellid, asook bewerings dat studente fisiek geïntimideer is tydens die betoging, sal dringend ondersoek word. “Enige sodanige kriminele optrede, asook onbehoorlike ontwrigting van akademiese aktiwiteite, sal in ooreenstemming met die universiteit se dissiplinêre prosesse en kriminele wetgewing hanteer word.”

Die EFFSC voer egter aan dat studente se besware heeltemal geregverdig is. Volgens die party het studente wie se aansoek vir private akkommodasie ná 14 April vanjaar goedgekeur is, nie hul volledige kos- en verblyftoelae vir Mei ontvang nie.

‘n Skermskoot uit die video.

“Dit beteken hierdie studente moet heeltemal op die R941 staatmaak om hul akkommodasie te betaal en maaltye te koop vir die hele maand van Mei, synde bewus te wees van die eenvoudige feit dat eksamens aan die gang is. Dit beteken die studente wie se aansoeke vir private akkommodasie ná 14 Mei goedgekeur is, sal ook nie hul volledige kos- en verblyftoelae vir Junie ontvang nie.”

Die studentekommando voer verder aan studente is ook ongelukkig oor aansoeke vir private akkommodasie wat “al twee tot drie maande gelede by die kantoor vir finansiële hulp ingedien is”, maar steeds nie geprosesseer is nie. “Die studente sal deur die eksamen moet gaan met ʼn tekort aan kos en die stres daarvan om die betaling van hul huur uit te stel by hul arrogante en aggressiewe verhuurders.”

Die EFFSC het gesê hy eis dat studente se kos- en verblyftoelae summier ten volle betaal word, dat studente wat vir private akkommodasie aansoek gedoen het onmiddellik reaksie op hul aansoeke kry, en dat die universiteit nagraadse studente wat aanvanklik deur NSFAS gefinansier is se studies moet betaal en die skuld op hul studenterekeninge moet afskryf.

Loader sê akademiese en administratiewe bedrywighede op die Bloemfontein-kampus gaan vandag soos normaal voort.