Vakbond tree in die bres vir polisie ná onttrekking uit Jhb-middestad

Oproerige buitelanders het Donderdag polisielede in die Johannesburgse middestad aangeval toe hulle ‘n klopjag wou uitvoer. (Foto: Nhlanhla Phillips/ANA)

Die vakbond Popcru het in die bres getree vir polisielede wat Donderdag uit die Johannesburgse middestad onttrek het, nadat ʼn woedende skare hulle aangeval het.

“Ons glo baie sterk dat Donderdag se optrede gekoördineer en fyn uitgewerk was en gedeeltelik daarop gemik was om die polisie uit te lok en as wreed en onbevoeg uit te beeld,” het die vakbond Saterdag in ʼn verklaring gesê.

“Ons loof ons lede vir hulle besluit om te onttrek aan wat duidelik ʼn plofbare situasie was en tot onnodige lewensverlies of beserings kon gelei het. Dit was ʼn aanduiding van hulle moed en verstandigheid.”

Popcru het die African Diaspora Forum (ADF) se uitlatings dat die optrede viktimisering was, gekap. “Daar is een wet vir almal wat in dié land woon en die forum moet binne daardie raamwerk optree,” het Popcru gesê.

Die vakbond het gesê pleks daarvan om onnodige verdeeldheid te saai, moet die ADF gehoorsaamheid aan ʼn gasheerland se wette bevorder.

“As ons lede aangeval word, moet hulle hulself beskerm en hulle mag nie toelaat dat wetteloosheid in ons gemeenskappe posvat nie. Dit moet binne billike maatreëls gedoen word.

“Ons vra diegene wat by polisiëring betrokke is, die regering en verteenwoordigers van kleinsakeondernemings om byeen te kom en te praat om dít wat ons Donderdag sien gebeur het, in die toekoms te vermy,” het Popcru gesê.

Die burgerregtegroep AfriForum het vroeër ook sy kommer uitgespreek oor die polisie se oënskynlike onvermoë om die situasie in bedwang te bring. Hy het gesê die polisie het daardeur bevestig dat sy tegnieke om burgerlike onrus en oproer te beheer daartoe beperk is om óf met uiterste geweld op te tree óf glad nie te reageer nie.

Ian Cameron, AfriForum se hoof van gemeenskapsveiligheid, het egter ook gesê die polisie op grondvlak kan nie die skuld kry vir die polisie se uitdagings nie, “omdat politieke inmenging en swak leierskap twee van die hoofredes is waarom die polisiediens tans kruppel is”.

“Dit bevestig wat ons nog altyd vermoed het en waarteen ons geruime tyd al waarsku: die polisie is onderbeman, swak toegerus en onvoldoende opgelei om op ’n verskeidenheid maniere teen burgerlike onrus en oproere op te tree,” het Cameron gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

72 Kommentare

jongste oudste gewildste
Catherine

Polisie hardloop WEG…..nogal snaaks. Net in RSA!

Jr

Popcru or popeye. Dit is die confusion.

Tokkie

Hulle wou die grense mos vir alle buitelanders oopstel

Werner

Sien die Nigiriers se JHB behoort nou aan hulle

Wurmpie

En nou moet die unie ń sopstorie uitdink om polisie se slapgatheid te probeer weg redeneer