Vakbond wil banke tot stilstand dwing weens afleggings

Argieffoto

Die bankwerkersvakbond Sasbo voorspel tot 10 000 mense kan net vanjaar in die bankwese hulle werk kwyt wees.

Joe Kokela, sekretaris-generaal van Sasbo, sê die vakbond berei voor vir ʼn staking aanstaande maand, waartydens hy banke tot stilstand wil dwing.

Volgens Kokela beoog Absa om meer as 800 werkers af te lê, Standard Bank beoog om nagenoeg 1 800 werkers af te lê, terwyl nog 6 000 werkers op een of ander manier geraak gaan word. Hy het gesê Nedbank beoog om 3 000 mense in verskillende fases af te lê, terwyl Old Mutual dit ook oorweeg, maar nog nie getalle bekend gemaak het nie.

Nedbank het reeds met die proses begin.

“Die banke is besig om werksgeleenthede te vernietig. Bou hulle die land, of breek hulle dit af?” het Kokela aan Maroela Media gesê. “Ons is uiters bekommerd.”

Volgens Kokela het Sasbo nagenoeg 73 000 lede, waarvan die meeste by banke werk.

“Hierdie mense gaan deel vorm van die werkloosheidsyfer wat reeds op 29% staan. Wat gaan hulle doen as hulle werkloos is? Dit gaan lei tot verhoogde armoede en selfs misdadigheid.”

Hy het gesê hulle voer ook samesprekings met ander vakbonde om aan die staking deel te neem.

Sasbo het gesê ten spyte van sy pleidooie by Nedbank om die afleggings te staak, gaan Nedbank van vandag af voort om afleggingskennisgewings aan werkers te gee.

Nedbank onderhandel reeds ʼn geruime tyd met 1 500 werkers oor moontlike afleggings om die sukkelende ekonomie en toenemende mededinging te bowe te kom, het eNCA vroeër berig. Hulle werk in sy kleinhandel- en sakebankafdeling.

Die vakbond sê hulle het die bank vantevore gevra om die skeidingspakkette wat aangebied word, te verbeter in ʼn poging om die situasie vir geraakte werkers meer draaglik te maak, maar Nedbank het dit nie aangepas nie.

Die bank het wél ʼn program waarvolgens werkers met ander vaardighede toegerus word sodat hulle elders kan werk. Sasbo het ʼn beroep op mense gedoen om opleiding te ondergaan wat hulle sal help om werk te kry, al is dit nie noodwendig by die bank nie.

Hy het sy lede gevra om verhuising, ʼn laer posisie en selfs ʼn salarisverlaging te aanvaar, eerder as om werkloos te wees.

“Bankwerkers is neerslagtig. Mense weet nie of hulle nog werk gaan hê nie. Die finansiële dienstesektor is in dié stadium ʼn ongemaklike omgewing om in te werk,” het Kokela gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Johan

JA, PLUK MAAR WAT JULLE GESAAI HET

Ore

Sasbo het jou werklikwaar uit die dode wakker geword.Nooit vir bankamptenare geveg nie.

JohanR

Hoeveel vakbonde is daar in Suid Afrika? Is daar al ‘n vakbond al vir bommelaars? Sommer eerdags! Die vakbonde rol behoorlik in die geld. Miskien kan hulle die afgedankte werkers in diens neem?

A Klaassen

Tog het die banke geld om hulle banke elke paar maande ‘n oordoen te gee.? Alles gaan om te wys hoe suksesvol hulle is al is dit ten koste van sy werkers.

Manie

Dit neem alreeds ‘n uur om ‘n bankkaart by Nedbank af te haal, so langer wag is ons voorland.