Leeukop in Kaapstad. Foto: Maroela Media
’n Man is Woensdag in ’n valskermsweeftuigongeluk op Leeukop in Kaapstad dood.
Wildernis-soek-en-redding (WSAR) is 12:38 van die voorval ingelig waarna die departement van gesondheid se AMS-helikopter ontbied is en ’n grondspan ontplooi is om ’n tydelike landingsone by die kramat (die graf van ʼn heilige by die Moslem-begraafplaas) gereed te kry.
Volgens Johann Marais, WSAR-woordvoerder, is ’n reddingswerker en paramedikus naby die toneel afgelaai en is daar op die 57-jarige man afgekom wat noodlottige beserings opgedoen het.
“Nog reddingswerkers is met die helikopter na die ongelukstoneel geneem waarna die liggaam van die berg verwyder is.”
Die polisie ondersoek die voorval. Die WSAR het sy medelye met die oorledene se familie en vriende betuig.
