Veearts skiet vrou: ‘Dit is wat ons bevind het’  

Trysie en Jesse Coleman. Foto: Verskaf

Mike Bolhuis, die bekende spesialis-ondersoeker, het Dinsdag voorlopige bevindinge bekendgemaak van sy ondersoek na die voorval waartydens dr. Jesse Coleman (68) sy vrou geskiet het.

Maroela Media het Maandag berig Coleman se vrou, Trysie (58), is deur die polisie en Bolhuis se ondersoekagentskap, Mike Bolhuis Specialised Security Services, ondervra. Dit was nadat sy ná byna ʼn week se behandeling in die waakeenheid van ʼn Johannesburgse hospitaal sterk genoeg was om haar weergawe van die gebeure in die vroeë oggendure van 5 Mei op die egpaar se plaas tussen Delmas en Bronkhorstspruit te deel.

“ʼn Gedugte span, bestaande uit oudkol. Vince Harris en oudkol. Luke Enslin, is aangewys om die saak te ondersoek. Hulle is die hoofde van ons ernstige geweldseenheid en kon die vinnigste ʼn bevinding maak,” het Bolhuis aan Maroela Media gesê.

“Ná ʼn diep en deeglike spesialis-ondersoek dui die voorlopige bevinding daarop dat die skietvoorval ʼn ongeluk was. Dit is ons bevinding dat dit nie kwaadwillig of met opset deur Jesse gepleeg is nie,” het Bolhuis aan Maroela Media gesê.

Bolhuis het beklemtoon die saak is nog aan ʼn hele paar wetlike prosesse onderhewig.

“Die staat gaan voort met ballistiese ondersoeke op die vuurwapen en die finale besluit op vervolging berus by die nasionale vervolgingsgesag nadat hulle al die bevindinge behoorlik bestudeer het. Die polisie sal ook nog ondersoek instel of hy onverantwoordelik met die vuurwapen opgetree het en bevoeg is om oor ʼn vuurwapen te beskik. So daar is beslis nog prosesse van die staat en polisie wat deurgevoer gaan word.”

Bolhuis en sy span het nou saam met die Delmas-polisie se speurders gewerk en volgens Bolhuis het hulle goeie samewerking gehad.

Trysie se familie het vermoed daar was moontlik vuilspel en het Bolhuis as ondersoeker en familiewoordvoerder aangestel om berusting te vind. Daar is aanvanklik ʼn interdik teen Coleman gekry om te verhoed dat hy met Trysie kontak maak alvorens haar verklaring geneem is sodat hy nie moontlik met die ondersoek kon inmeng nie.

Coleman het verlede week sy weergawe van die gebeure deur die skakelagentskap Martina Nicholson Associates vertel en beweer hy het haar as ʼn inbreker aangesien.

In sy verklaring het Coleman gesê hy het “diep berou” oor die “skietongeluk” waarin sy vrou ernstig in die maag gewond is. Hy het aangedui hy is diep teleurgesteld en hartseer deur “onakkurate en skadelike” mediaberigte wat ná die voorval deur sommige mediahuise geplaas is. “Dit was ʼn aaklige ongeluk en ek kan nie ophou dink aan die pyn en lyding wat my vrou nou daardeur moet ervaar nie, asook oor die gevaar waarin sy is.”

Coleman het beriggewing verwerp dat hy en sy vrou verhoudingsprobleme gehad het.

Bolhuis het gesê Coleman sowel as Trysie se families word bygestaan met berading om ter wille van Trysie se herstelproses enigheid te vind. Die families is ook versoek om almal weer toegang tot haar te gee om haar sodoende by te staan.

Kapt. Carla Hartley, woordvoerder van die Delmas-polisie, het Dinsdag aan Maroela Media bevestig die polisie het Trysie se verklaring afgeneem en sy het aan speurders gemeld dat dit glo ʼn ongeluk was.

“Die ondersoek duur egter voort en daar word gewag vir forensiese verslae. Sodra alles gereed is, sal die dossier aan die nasionale vervolgingsgesag oorhandig word vir beslissing,” het Hartley gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Justice

Dit is nou goeie nuus – sterkte met die lang pad van herstel.

Poppie

WONDERLIKE NUUS!!! PRYS DIE HERE!!!!!! Dankie Liewe Heer, dit was ‘n ongeluk… Ek so bly. Speedy recovery, mevrou. Sterkte x

stellie

Ek is baie bly dit was n ongeluk. Maar ek is dankbaar ek is nie in die familie se skoene wat die man weer in die oë moet kyk nie!

Johann

Hoekom sal familie sulke bekommernisse in die openbaar uiter as daar nie n gegronde rede voor is nie? En hoekom n PR Maatskappy aanstel om namens jou n verklaring saam te stel.om.te sê jys jammer en dit was n ongeluk.en die media dit en dat. Zuma en die Guptas het iok n PR Maatskappy aangestel om hulle “onskuld” te verwoord????? Hiers n slang in die gras en dis nie n slang wat die veearts wil gesond maak nie….

al

Ai ek is baie bly hierdie verhaal het ñ goeie einde. Mag sy vinnig aansterk en die familie en eggenoot oor hierdie hekkie van wantroue kom.