Veearts skiet vrou: Trysie is wakker en lê verklaring af

Trysie en Jesse Coleman. Foto: Verskaf

Trysie Coleman (58) wat voorverlede Vrydag glo per ongeluk deur haar veearts-man, dr. Jesse Coleman (68), geskiet is nadat hy haar glo as ʼn inbreker aangesien het, is buite gevaar, wakker en het reeds haar verklaring aan die polisie afgelê.

Mike Bolhuis, spesialis ondersoeker en woordvoerder namens Trysie se familie, het Maandag aan Maroela Media gesê Trysie is by haar volle bewussyn.

“Sy sterk aan en dit gaan baie beter met haar. Haar gedagtes is 100 persent helder. Haar familie is aan haar sy en staan haar by. Daar is tans ʼn interdik teen Jesse ingestel wat tot die einde van die maand geldig is, om te verhoed dat daar met die ondersoek ingemeng kan word,” het Bolhuis gesê.

Volgens Bolhuis vermoed Trysie se familie gemene spel en sy agentskap, Mike Bolhuis Specialised Security Services, is versoek om dit te bewys, al dan nie. “Sy het reeds haar verklaring aan die polisie afgelê. Ons gaan later vandag met haar praat, waarna die volgende stappe bepaal sal word.”

Bolhuis het gesê hulle werk nou saam met die Delmas-polisie en daar is goeie samewerking.

Jesse het verlede week sy weergawe van die gebeure in die vroeë oggendure op 5 Mei op hul plaas tussen Delmas en Bronkhorstspruit deur die skakelagentskap, Martina Nicholson Associates, vertel.

In sy verklaring het Coleman gesê hy het “diep berou” oor die “skietongeluk” waarin sy vrou ernstig gewond is.

Hy het aangedui hy is diep teleurgesteld en hartseer deur “onakkurate en skadelike” mediaberigte wat ná die voorval deur sommige mediahuise geplaas is. “Dit was ʼn aaklige ongeluk en ek kan nie ophou dink aan die pyn en lyding wat my vrou nou daardeur moet ervaar nie, asook oor die gevaar waarin sy is.”

Coleman het beriggewing verwerp dat hy en sy vrou verhoudingsprobleme gehad het.

Kapt. Carla Hartley, woordvoerder van die Delmas-polisie, was nie onmiddellik vir kommentaar beskikbaar nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Poppie

PRYS DIE HERE! Sy is wakker… Mag die waarheid uitkom. Word gou gesond Mevrou x

T

Baie Sterkte! Baie bly sy is wakker. Kom ons hoop dit was n ongeluk, en sit nie en wag vir die lelike nie.

Hannelie

Dank die Here dat sy bygekom het! Nou moet sy net herstel en ek glo haar familie se ondersteuning gaan vir haar nou baie beteken. Gou gesond word.

Genieve

Hoop net nie die storie het n lelike kant nie. En dat die waarheid sal seevier.

GG

Hou ons asseblief op hoogte Maroela.