Veiligheid vir Bonteheuwel te midde van nóg misdaad

Honderd polisiebeamptes is ontplooi en werk in skofte om ʼn oog oor Bonteheuwel te hou. (Foto: Facebook)

Die Stad Kaapstad het vandeesweek veiligheid in Bonteheuwel opgeskerp te midde van nóg ʼn voorval in dié Kaapse buurt.

ʼn Agt maande oue baba is egter hierdie keer die slagoffer van dié misdaadgeteisterde gebied wat gereeld onder geweld en bendeverwante voorvalle deurloop.

Volgens kapt. FC van Wyk, woordvoerder van die polisie, is ʼn saak van verkragting by die Bonteheuwel-polisiestasie aanhangig gemaak ná ʼn voorval op 29 Junie plaasgevind het.

Van Wyk wou nie in dié stadium meer inligting rakende die voorval bekendmaak nie, maar het wel bevestig dat niemand nog in verband met die voorval in hegtenis geneem is nie.

Die Stad Kaapstad se tweede buurtveiligheidspan is sedertdien in die buurt ontplooi om misdaad te bekamp.

JP Smith, die Stad Kaapstad se burgemeesterskomiteelid vir veiligheid, het Dinsdag in ʼn verklaring gesê 100 polisiebeamptes is ontplooi en werk in skofte om ʼn oog oor Bonteheuwel te hou.

Luidens die verklaring sal die beamptes ʼn sigbare teenwoordigheid handhaaf, asook verantwoordelik wees vir die hantering van oortredings. Hulle sal Kaapstad se metropolisie, verkeersdiens en die polisie met misdaadvoorkomingspligte bystaan.

Die stad het sy eerste buurtveiligheidspan in Desember 2017 in Delft van stapel gestuur in ʼn poging om misdaad te bekamp in voorstede wat deur die polisie se jaarlikse misdaadstatistieke geïdentifiseer is.

Die gereelde voorvalle asook die feit dat Bonteheuwel nie ʼn polisiestasie het nie, het daartoe gelei dat die tweede span hiér ontplooi is, het Smith verduidelik.

Die model rakende die buurtveiligheidspan sluit deursoekingsoperasies en patrollies in.

Daar is egter ook ʼn maatskaplike element wat op die span se skouers sal rus soos die aanmeld van diensversoeke vir stadsverwante infrastruktuur. Dié versoeke sal stukkende straatligte wat reggemaak moet word of vermiste dreindeksels insluit. Die span sal ook sommige wette in die buurt toepas.

“Indien [die kwessies] nie nagegaan word nie, kan bogenoemde probleme tot ʼn omgewing lei waar misdaad en geweld die norm word. Daarom gebruik die model [van ʼn buurtveiligheidspan] ʼn hele gemeenskapsbenadering,” verduidelik Smith.

Volgens Smith sal die span nou saam met inwoners, gemeenskapsorganisasies en skole saamwerk om Bonteheuwel veiliger te maak. “Misdaad raak almal. Ons stad staan ​​voor ʼn ongekende krisis, veral met bendeverwante moorde. Die Stad Kaapstad het nie die hulpbronne of die mandaat om dit alleen te doen nie, maar ons is nog steeds daartoe verbind om Kaapstad veiliger te maak, veral vir diegene wat erg deur misdaad geraak word,” lui die verklaring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

Het jy iets op die hart? Maroela Media se kommentaarfunksie word ongelukkig tydelik gesluit tussen 22:00 en 06:00 op Vrydagaande, Saterdae, Sondae en Maandagoggende.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.

5 Kommentare

Nivea ·

Sies ek het nie meer woorde vir ons land nie 8 mnde, nee gids dit raak belaglik

John ·

Kan die VFPlus en AfroForum nie nou inspring en plek maak vir die Afrokaners wat ‘n rustige boerplekkie soek nie. Met die vollop geldjies van die Afrokaner-unie en gratis alles vir die ouens wat die Trek gemis het, kan die wa deur die vlakte getrek word… Sonder grense en baie gegriefde mense, en die nuwe nuwe Afrokaner-tuisland kook. Geen meer bendes nie met die cannabis-landerye wat op die ontsoute water uitspruit vir uitvoere en druiwe aan die wynstok… Met Peter Marais as prez… Kom mense pak in en trek af…

marous ·

Voorsien die publiek van wapens dan sorteer hulle dit binne ‘n maand uit , sonder die polisie of howe se inmenging .

Nel ·

Hoe lank dink jy gaan daai ‘rustige boerplekkie’ rustig bly as dit die doelwit is om die blankes uit Suid Afrika te verjaag??

Delwer ·

Dit was lankal tyd om goud te koop. Gee jou rande vir goud net waar jy kan.So gaan die liedjie. Krugerrande is nou oppad na ‘n rekord prys. Het iemand vir my enige munte teen laasmaand se prys?

Het jy iets op die hart? Maroela Media se kommentaarfunksie word ongelukkig tydelik gesluit tussen 22:00 en 06:00 op Vrydagaande, Saterdae, Sondae en Maandagoggende.

Jy kan steeds op Maroela Media se Facebook-blad en ander sosiale media saamgesels. Nuuswenke kan deur hierdie vorm gestuur word.