Argieffoto: SAPD/Facebook
ʼn Veiligheidswag is Dinsdagmiddag in Polokwane, Limpopo, tydens ʼn gewapende roof doodgeskiet.
Kol. Ronel Otto, provinsiale polisiewoordvoerder, het Woensdag gesê die voorval het omstreeks 17:30 by ʼn sakeperseel in Magna Via plaasgevind.
“Veiligheidswagte van Fidelity Security Group het geld gaan oplaai toe hulle deur vyf gewapende verdagtes, wat klapmusse gedra het, oorval is,” het Otto gesê.
Die wag is tydens die rooftog doodgeskiet.
Die verdagtes het in twee voertuie met ʼn onbekende hoeveelheid kontant van die toneel gevlug.
Niemand is nog in verband met die voorval in hegtenis geneem nie.
