Verdagte vas ná dubbelmoord op Kraaifontein-beamptes

(Argieffoto; SA Polisie)

ʼn Verdagte is in hegtenis geneem in verband met die dubbelmoord op twee polisiebeamptes van Kraaifontein in die Wes-Kaap.

Die twee beamptes is Sondag in die vroeë oggendure in die Bloekombos-omgewing doodgeskiet toe hulle tydens ʼn patrollie oënskynlik in ʼn hinderlaag gelei is.

Sers. Mnakwazo Mdoko (46) en konst. Mninawa Breakfast (28) is op die toneel dood en hul dienspistole is gesteel.

Die hulp van die Valke is ingeroep om die moorde te ondersoek.

Kol. Katlego Mogale, woordvoerder van dié eenheid, sê ʼn 32-jarige man is sedertdien in ʼn gesamentlike operasie van die Kraaifontein-polisie, die honde-eenheid en lede van die misdaadintelligensie-eenheid in Mandela Park in Khayelitsha aangekeer.

“Die verdagte verskyn Dinsdag in die Bluedowns-landdroshof op aanklagte van moord. Die ondersoek duur voort en ons kan nie die moontlikheid uitsluit dat ander verdagtes ook met die moorde verbind word nie,” het sy gesê.

Lt.genl. Godfrey Lebeya het die inhegtenisneming verwelkom.

Bheki Cele, minister van polisie, het die afgelope naweek gevra vir swaarder strawwe vir polisiemoordenaars en gesê hulle is ʼn nasionale bate wat beskerm moet word.

Hy het beamptes ook daaraan herinner dat hulle dodelike geweld mag gebruik om hulself te beskerm.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

3 Kommentare

Samuel ·

Tien teen een gaan die vermeende moordenaar wegkom – met moord.

Casper ·

Ek lees nie dat die vuurwapens opgespoor is nie.Indien NIE moet iemand anders dit nog hê.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.