Die polisie in Willowvale in die Oos-Kaap het ʼn 26-jarige man in hegtenis geneem in verband met die moord op ʼn 23-jarige man. Dié man is Vrydag in ʼn kroeg op dié dorp dood.
Kapt. Jackson Manatha, woordvoerder van die polisie, sê die voorval het glo omstreeks 20:30 by die Tywaka-nedersetting in Willowvale plaasgevind.
Volgens Manatha het ʼn rusie tussen die twee mans onstaan, waarna die 26-jarige man ʼn mes uitgepluk en die ander man doodgesteek het.
“Die oorledene, wie se naam nie in dié stadium bekendgemaak mag word nie, is in sy bolyf gesteek en is op slag dood,” sê hy.
Die 26-jarige verdagte is volgens Manatha ure later deur die polisie vasgetrek. Hy word aangekla van moord en sal Maandag in die Willowvale-landdroshof verskyn.