Verkiesingsuitslae: Só staan sake tans

Die verkiesingsuitslae soos dit Donderdagoggend om 05:30 gelyk het toe nog net 13,77% van stemme getel is. (Grafika: OVK)

[LET WEL] Die onderstaande inligting is die stemuitslae soos dit Donderdag om 05:30 vertoon het. Die uitslae word deurentyd opdateer namate die tel van stemme vorder. Sien die jongste uitslae.

Teen Donderdagoggend vroeg het die ANC voorgeloop in die sesde nasionale demokratiese verkiesing met 11% van nasionale stemme wat al getel is.

Hoewel politieke partye die uitslagborde in die nasionale uitslagsentrum in Pretoria met opgehoue asem dophou, is dié persentasie nog gans te min om ʼn betroubare idee van die finale uitslae van die verkiesing te gee.

Teen vanoggend is 1 339 764 nasionale stemme getel – 1 322 557 van hierdie stemme was geldig en  17 207 bederf. Die geraamde kiesersopkoms staan tans op 64,38% met 3 156 (13,77%) stemdistrikte waarvan die stemme getel is.

Die ANC het op die oomblik 52,75% van stemme ingepalm, gevolg deur die DA met 28,34% stemme. Die EFF is tans in die derde plek met 7,49% stemme, die Vryheidsfront Plus in die vierde plek met 3,86% stemme en die IVP in die vyfde plek met 1,36% stemme. Patricia de Lille se Good-party kon tot dusver 0,91% stemme inpalm en Cope kon tot dusver net 0,42% van stemme op die party verenig.

Ten spyte van die BLF se oortuiging dat dié party setels in die volgende parlement sal verseker, kon die party tot dusver nog net 704 stemme (0,05%) werf.

Die eerste uitslae het gisteraand kort voort middernag ingekom van ʼn piepklein stemlokaal in die Oos-Kaap waar slegs 21 mense gestem het. Die tellery van die stemme het dwarsdeur die nag voortgeduur.

Teen 05:30 was 26,35% van die stemme in die Wes-Kaap getel en het die DA sterk voorgeloop met 57,5% van die stemme. Die ANC is tans in ʼn stewige tweede plek in dié provinsie met 25,83% stemme gevolg deur die VF Plus met 3,46% stemme.

In Gauteng, sekerlik een van die hoogs betwiste provinsies, is daar tans nog net 6,7% van stemme getel. Tans loop die ANC ver voor in die provinsie met 54,84% van stemme, gevolg deur die DA met 23,17% en die EFF met 12,66% stemme.

In die Vrystaat is net minder as 15% van stemme al getel. Die ANC loop tans voor met 59,5%, gevolg deur die DA (20,86%), die EFF (9,59%) en die VF Plus (5,2%).

In KwaZulu-Natal is nog net sowat 4,2% van stemme getel en dit is geen verrassing dat die ANC verreweg die sterkste vertoon met 55,23% van die stemme nie. Die Inkatha Vryheidsparty kon tot dusver 18,03% stemme in die provinsie bymekaarmaak, gevolg deur die DA met 14,76% en die EFF met 6,62%.

Die verkiesingsuitslae soos dit Donderdagoggend om 05:30 gelyk het. Die groen gedeeltes verwys na die ANC, geel na die DA, rooi na die EFF en pers na die VF Plus. (Grafika: OVK)

Die ANC vertoon tans nog sterker in die Oos-Kaap waar byna 21% van stemme getel is. Die ANC loop voor met 72,39%, gevolg deur die DA met 14,36%, die EFF met 6,11% en die UDM met 1,71%.

In die Noord-Kaap is 45% van die stemme reeds getel. Hiér loop die ANC voor met 54,26% stemme, gevolg deur die DA (28,82%), die EFF (6,64%) en die VF Plus (5,12%).

In Limpopo, EFF-leier Julius Malema se tuisprovinsie, is die rooi barette tans in die derde plek met 4,91% van stemme wat tot dusver getel is. Die ANC neem ook hiér die voortou (65,81%) gevolg deur die DA (12,6%) en die EFF (11,25%).

Dieselfde patroon is in Mpumalanga sigbaar waar 14,67% van stemme getel is. Die ANC loop voor met 64% van stemme, gevolg deur die DA (14,87%) en die EFF (10,33%).

In Noordwes, ‘n provinsie wat oor die afgelope jaar gebuk gegaan het onder talle diensleweringbetogings, blyk dit tans of die meeste kiesers weer hul vertroue in die ANC gestel het. Sowat 16,8% van stemme is reeds in die provinsie getel. Die ANC het 60,79% stemme ingepalm, gevolg deur die EFF met 14,74% stemme en die DA met 13,30%.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Pieter du plessis

Dit is net soos in Zimbabwe die mense brand en breek af maar kom die verkiesing dan stem hulle vir die einste party wat verantwoordelik is vir hulle ellende.

Boerboel

More almal. Ja die ANC loop gerieflik voor. Kom ons hoop dat die kleiner partye meer stemme kry .Good party het defnitief stemme gevat by DA. VF + doen ook nie te sleg nie.

Gemaskerde Sopbeen

As jy ‘n verniet geldjie kry, al is dit hoe min, nie vir elektrisiteit betaal nie, en dagdroom oor promises van ‘n huis en ‘n plaas……terwyl jy jouself in die naaste spruit of rivier verlig….dan trek jy maar jou kruisie waar jy geel swart en groen sien, met ‘n wit hand wat ‘n assegaai vashou, en ‘n hoist-wiel wat nie wil draai nie….Shame man.

Mel

Ek verstaan nie wie stem vir die ANC nie!!! Ellende, geen werk, geen beloftes na gekom oor 25 jaar……hoe werk dit???

Elna

Ek hoop dat ek toegelaat gaan word om te se wat ek dink van die storie. A en see sal gerieflik voorloop omdat dit vir die sesde keer nie n regverdige vry verkiesing is nie daar was al klaar stembriewe in bokse wat omgeruil was soos nog elke jaar gebeur en dis waarom a en see altyd ver voorloop. Die beste voorstel is om n regverdige vry verkiesing te he is om jou kaart Id deur n masjien te druk met jou besonderhede op en n scaner om jou duim se af druk te vat en dan jou wysvinger op… Lees meer »