Verloofdes se sprokiestroue dalk aan skerwe ná diagnose

Marlize Kriel. (Foto: Facebook)

Marlize Kriel. (Foto: Facebook)

ʼn Verloofde paartjie van Witbank in Mpumalanga sal moontlik genoop word om hul troue uit te stel nadat Marlize Kriel (23) met gewasse op die brein gediagnoseer is en nou sowat R500 000 vir ʼn breinoperasie moet opdok.

Adam Viljoen, Kriel se verloofde, het aan Maroela Media gesê Kriel is vroeër vanjaar met Von Hippel-Lindau se siekte, ʼn oorerflike siekte wat gekenmerk word deur die vorming van gewasse en vloeistofgevulde sakke (siste) in baie verskillende dele van die liggaam, gediagnoseer. Dié gewasse is nie altyd kwaadaardig nie, maar veroorsaak ongelooflike pyn en drukking op die brein.

Viljoen het vertel Kriel se pa, Johan, is in Januarie verlede jaar dood ná komplikasies van ʼn breinoperasie nadat hy ook gewasse in sy liggaam weens Von Hippel-Lindau se siekte opgedoen het. “Haar pa sʼn was so erg dat hy sy niere ook verloor het en moes dialise kry en ʼn gewas is van sy breinstam verwyder. Die operasies was wel ʼn sukses, maar hy het sepsis (bloedvergiftiging) in die hospitaal opgedoen en is daaraan oorlede.”

Juis daarom was die familie bekommerd toe Kriel vroeër vanjaar van erge hoofpyne begin kla. “Sy was twee keer by die huisdokter, wat vir haar gesê het dit is streshoofpyne en vir haar inspuitings gegee het vir die pyn. Ek het egter geweet iets is nie pluis nie en het besluit om by ʼn mediese fonds aan te sluit ingeval ons dit nodig kry,” het Viljoen gesê.

Marlize en Adam se verlowing. (Foto: Verskaf)

Marlize en Adam se verlowing. (Foto: Verskaf)

Volgens Viljoen het hy by ʼn makelaar op Middelburg aangeklop wat die mediesefondsaansluiting namens die paartjie behartig het. Die mediese fonds het hulle in kennis gestel dat ʼn wagtydperk van drie maande geld voordat hulle enige eise kan indien en drie paaiemente is ook deur ʼn debietorder uit Viljoen se bankrekening onttrek.

“Marlize het egter tydens die drie maande lange wagtydperk so siek geword dat sy ʼn neurochirurg, dr. Ernst van Graan, by die Kloof-hospitaal in Pretoria moes spreek. Hy spesialiseer in Marlize se siekte. Hy het toe ʼn skandering van haar brein gedoen en twee gewasse, een grote bo-op haar brein en een kleintjie nader aan die breinstam, is by Marlize gediagnoseer.”

Viljoen verduidelik dat Kriel “ongelooflike pyn ervaar het” omdat die vog op haar brein nie dreineer het nie. “Die dokter het in April vir haar ʼn shunt ingesit, wat baie eenvoudig verduidelik kan word as ʼn elektroniese toestel wat in die skedel geplaas word met ʼn pypie wat na die blaas lei, om sodoende te help met die dreinering van die vog.”

Marlize na die eerste operasie waartydens die "shunt" in haar skedel geplaas is. (Foto: Verskaf)

Marlize na die eerste operasie waartydens die “shunt” in haar skedel geplaas is. (Foto: Verskaf)

Volgens Viljoen was Kriel se hoofpyn so erg dat die linkerkant van haar lyf tydelik lam geraak en haar linkeroog skeefgetrek het. “Ons kon toe nou uiteraard ook nog nie by die mediese fonds eis vir die operasie nie en die familie het gesamentlik R150 000 ingesamel om vir die prosedure te betaal.”

Viljoen het gesê dr. Van Graan het vir hulle gesê dat hy die operasie om die boonste gewas te verwyder so gou as wat die drie maande wagtydperk by die mediese fonds verby is, wil uitvoer. “Hy het ook briewe aan die mediese fonds gerig waarin hy die erns van Marlize se toestand benadruk het.”

Dit was egter vir die paartjie ʼn groot slag toe die mediese fonds laat weet het hulle gaan nie die operasie dek nie. “Die fonds meen dat ons sekere inligting van hulle weerhou het toe ons aanvanklik aansoek gedoen het. Marlize het byvoorbeeld in 2013 saam met haar broer vir ʼn roetinebreinskandering gegaan omdat hul pa met dieselfde siekte gediagnoseer was. Ons moes glo dié skandering aangemeld het, maar ons het nie geweet ons moet nie en ek het destyds nog nie vir Marlize geken nie.”

Die paartjie is al twee jaar lank in ʼn verhouding en reeds ʼn jaar daarvan verloof. “Ons moes glo ook Marlize se aanvanklike besoeke aan die huisdokter, wat vir haar die inspuitings vir die hoofpyne gegee het, aangemeld het. Tog het ons makelaar niks vir ons gesê nie, en hoe sal ʼn mens dit nou vanself weet?”

Die derde paaiement wat deur die mediese fonds afgetrek is, is weer aan hom terugbetaal, maar dié fonds is nog R10 000 aan hom verskuldig. “Mense sê vir my ek gaan dit nie terugkry nie. Die fonds het intussen laat weet hulle kanselleer ons dekking en ek het nou eers my kaart in die pos gekry.”

Marlize en Adam. (Foto: Facebook)

Marlize en Adam. (Foto: Facebook)

Viljoen het vertel Kriel se pa is dood in die privaat hospitaal waar hy behandel is. Dit laat hom so skrikkerig voel dat hy nog banger is om haar na ʼn staatshospitaal te laat oorplaas. “Ons het op dr. Van Graan se aanbeveling en verwysing ʼn dokter by ʼn staatshospitaal in Pretoria gaan spreek en solank vir Marlize op die waglys geplaas. Dié dokter is self deur dr. Van Graan opgelei en ook baie kundig oor haar siekte.”

Hoewel Viljoen weet dat sy verloofde in goeie hande sal wees in die staatshospitaal tydens die operasie, is dit die nasorg wat hom pla, juis omdat Kriel se pa nie weens sy operasie dood is nie, maar weens infeksie wat hy agterna opgedoen het. “Ek wil glad nie die hospitale slegpraat nie, want die mense was almal nog net goed vir ons, maar ons almal weet ook wat die situasie is by staatshospitale en ek is regtig bekommerd oor die higiëne. Ek wil haar nie graag daar sien lê nie.”

Die paartjie sal egter R500 000 moet opdok indien hulle wil voortgaan met die operasie by die privaat hospitaal deur dr. Van Graan. “Dit sluit nie net die operasie in nie, maar dek ook sekere koste wat moontlik agterna kan opduik, want ons weet nie of sy ná die operasie weer gaan moet leer praat of loop nie.”

Marlize se verloofring. (Foto: Verskaf)

Marlize se verloofring. (Foto: Verskaf)

Volgens Viljoen is hul troudatum reeds vasgestel en die onthaalplek se deposito betaal, maar hulle gaan moontlik die troue moet uitstel. “Marlize sê sy wil nie graag nie, want dit is die enigste ding wat haar in dié stadium moed en hoop gee om aan vas te hou. Ons het die geld wat ek en haar ma vir die troue gespaar het op die vorige operasie gebruik.”

Kriel is ook tans op ʼn waglys by die staatshospitaal om op die dokter daar se aanbeveling ʼn spinale MRI-skandering te laat doen. “Dit gebeur eers in Augustus, maar die operasie moet eintlik dringend gebeur. Ons speel vir tyd,” het Viljoen gesê.

Lede van die publiek wat die paartjie finansieel wil bystaan, kan met Viljoen kontak maak by [email protected]. Sy WhatsApp-kontaknommer is 072 340 2932 en mense kan hom ook bel by 064 683 6925.

“Dit gaan nie vir ons net oor die geld nie. Ons het mense se gebede broodnodig. Ons vra vir mense om vir Marlize te bid sodat sy genesing van die Here af kan kry.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

46 Kommentare

jongste oudste gewildste
SIEKFONDS

Besliste goeie hulp sal jy eerder by die REGTE hospitaal kry as by plekke met regte titels. Dit is moielik maar sterkte.

HPV

Wat regverdig hierdie astromomiese mediese koste? Soms voel mens jy word soort van afgepers omdat medies in staatshospitale verval het tot asolute geen diens of diens wat grens aan selfmoord. Mens het geen keuse meer nie, of betaal of sterf. Tragies om die minste te sê. Dieselfde kan van regskoste gesê word, of betaal of gaan tronk toe. Soms betaal mens en gaan in elk geval tronk toe. Koste aangegaan sonder ‘n waarborg!

leser

marlize en adam,
sterkte vir julle, ek dra julle ook aan Die here op in my gebede
glo en vertrou dat Die Here sy Hand van beskerming en genesing oor marlize sal hou

Gesiggie

Marlize en Adam.. jul is n prag van n paartjie.. en ek is so jammer dat jul deur al die pyn en hartseer moet gaan veral jy Marlize.. en dit nou dat jul al klaar die troue beplan het.. moet nie moed verloor daar is Angels daar buite wat weet dat jul n lewe saam wil bou en dat jul Lief is vir mekaar en vir altyd wil saam wees…Ek Glo en vertrou als gaan goed gaan en dat Marlize genees sal word… Hou vas aan jul Geloof en hou aan Glo… God sal voorsien

Michelle

Klop aan by die mediese fonds ombudsman, hy sal uitsluitsel gee of die fonds se optrede korrek was.