Vermeende vroueslaner verskyn in hof

Die Vrystaatse man wat na bewering minstens vyf vroue aangerand het, bly in aanhouding nadat hy Maandag vlugtig in die landdroshof op Odendaalsrus verskyn het.

Lodie van Dyk staan tereg op verskeie aanklagte van aanranding en van opsetlike saakbeskadiging. Foto: Verskaf

Lodie van Dyk (36) is verlede week in Bethlehem in die Oos-Vrystaat aangekeer en teruggebring na die Goudveldse dorp waar hy na bewering sy derde vrou, Domonique Vergottini, aangerand het.

Hy kom weer Vrydag voor op al die sake van aanranding teen hom, maar daar is nog nie sprake van borgtog nie.

Een van sy vermeende slagoffers, wat 21 was ten tyde van die beweerde aanranding, het Dinsdag gesê dit het ʼn hele ruk geduur voordat hy haar kon oortuig dat hulle by mekaar sou pas.

Van Dyk het Marina Janse van Rensburg (22) na bewering in Julie 2017 met die knie en vuis geslaan en bosse hare uit haar kop gepluk.

Sy sê aan die begin was sy baie versigtig vir hom, “maar op die een of ander manier het hy daai liefdekant in my weer na vore gebring”.

Marina Janse van Rensburg vertel nadat hy sy bed gebreek en ’n stuk daarvan deur die plafon gegooi het, wou sy hom los, maar hy het haar oortuig hy sou nooit sy hand teen haar lig nie. Foto: Verskaf

Sy sê sy val nie maklik vir iemand nie en was ook huiwerig weens die ouderdomsverskil van 14 jaar. “Hy het glad nie opgetree soos iemand wat baie ouer as ek is nie. Hy is nog lekker jonk van gees. Ons kon praat op dieselfde vlak en mekaar verstaan.”

Janse van Rensburg sê die eerste teken dat iets fout was in hul verhouding, was toe hy “letterlik sy bed deur die dak gegooi het”. Hy het die houtbasis van die bed gebreek en die een stuk deur die plafon gegooi, vertel sy.

Ek het begin huil en ek wou my goeters vat en ek wou gaan.

“Ek het begin huil en ek wou my goeters vat en ek wou gaan, maar toe het hy vir my gesweer: Ek moet net een ding verstaan, hy sal nooit sy hande teen my lig nie.”

Sy vertel die volgende twee weke het dit goed gegaan, maar toe gebeur die beweerde aanranding, die eerste en enigste keer. “Hy het my nie voor die tyd gedreig nie,” onthou sy.

Janse van Rensburg vertel Van Dyk het haar op die hande gedra. Foto: Verskaf

“Hy het nog vir my gesê hy gaan badkamer toe. Hy het teruggekom in die lapa, sy glas teen die muur stukkend gegooi en my begin slaan. Daar was nie ʼn rusie vooraf nie. Daar was niks vooraf nie. Alles was fine. Ek was net so geskok gewees …

As dit is hoe liefde lyk, dan wil ek eerder nie liefde hê nie.

“Ek weet nie hoe om dit te verduidelik nie. Dit het net gebeur. Die ander getuies sal dieselfde sê: Dit het net gebeur. Dit was ook net die eerste die laaste keer, toe het ek besluit om my goeters te vat en te loop, want ek is meer werd as dit.

“Daai is nie liefde nie. As dit is hoe liefde lyk, dan wil ek eerder nie liefde hê nie.”

’n Ondersteuningsgroep is op Facebook vir Marina begin waar sy van haar herstelpad vertel en haar frustrasie om haar saak teen Van Dyk nou al langer as ’n jaar keer op keer uitgestel is. Foto: Facebook

Die skok was soveel groter omdat hy haar vooraf op die hande gedra het. “Hy het nie eens ʼn vinger in my rigting gewys nie,” vertel sy. “Hy het my vreeslik bederf en wou net liefde gee en ontvang. Hy was wel een keer baie kwaad vir my oor ek nie saam met hom dorp toe wou ry nie.”

Ek wil net hê hy moet erken wat hy gedoen het.

Sy sê Van Dyk het “oor die algemeen baie gedrink”. Die aand van die beweerde aanranding was dit wodka. “En ek weet nie, dit kan moontlik wees [wat hom gewelddadig laat raak het], maar ek sal nie weet of dit dít was nie.”

Janse van Rensburg sê sy hoop die saak word eindelik afgehandel. “Ek wil net hê hy moet erken wat hy gedoen het en sy straf soos die man vat wat hy uitmaak hy is. Dis nou tyd dat dit stop.

“Hy doen dit al te lank,” beweer sy, “en kom net weg daarmee. Dis nou klaar.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
alida

Kan iemand vir my sê hoeveel mans het hy al so geslaan?

Justice

Daardie regtervuis en knie behoort met `n bofbalkolf aangerand te word.

Hannes

Sal nogal interresant wees om te weet

Liezel

Gooi die sleutel weg!!

Vodka

Vodka is n pes van drank, ek ken ook mense wat se koppe hul heeltemal los as hulle vodka drink! Ek se nie dit wat hy gedoen het is aanvaarbaar net omdat hy vodka gedrink het en vodka die skuld gee nie, maar daai drank maak nie reg met mens se kop nie…. eintlik watter drank doen ooit? Hy moet gestraf word vir dit wat hy gedoen het en beslis minder begin drink dan sal dinge hopelik beter gaan!