Vermiste Alberton-baba: ‘Ons volg talle leidrade op’

Eden Laird (Foto: Pink Ladies)

Eden Laird, die 13 maande oue baba van Brackendowns in Alberton wie se storie binne 24 uur derduisende Suid-Afrikaners se harte aangegryp het, is nog nie gevind nie.

Lt.kol. Lungelo Dlamini het Donderdagoggend aan Maroela Media gesê klein Eden word, 24 uur nadat hy verdwyn het, steeds vermis. Dlamini wou nie uitbrei oor die vordering van die ondersoek of inligting verklap rakende Eden se verdwyning nie.

“Al wat ek nou kan sê, is dat ons tans verskeie leidrade opvolg en alles in ons vermoë doen om hom op te spoor,” het hy gesê.

Dlamini is nie die enigste een wat so min moontlik inligting oor die ondersoek wil bekendmaak nie. Laird se ouers is volgens verskeie mediaberigte nie bereid om in dié stadium enige onderhoude toe te staan nie. ʼn Persoon na aan die familie het aan Maroela Media gesê alle betrokkenes is opdrag gegee om geen bykomende inligting rakende Eden se verdwyning bekend te maak nie, aangesien dit die ondersoek nadelig kan beïnvloed.

ʼn Woordvoerder van Pink Ladies, ʼn organisasie wat hom daarop toespits om vermiste mense op te spoor, het ook in antwoord op vrae op die groep se amptelike Facebook-blad gesê geen bykomende inligting kan verskaf word as dié wat reeds op sosiale media versprei is nie.

Pink Ladies se plasing oor Eden se verdwyning is teen Donderdagoggend reeds meer as 27 000 keer gedeel en talle mense het op die plasing gereageer met vrae, kommentaar en gebede vir die gesin.

Daar is ook Donderdagaand ʼn biduur vir baba Eden by die Bridge Church in Alberton gehou om te bid vir die veilige terugkeer van die seuntjie.

Maroela Media het vroeër berig die Laird-gesin se huishulp het Woensdag omstreeks 08:45 saam met Eden gaan stap, maar nie weer teruggekeer huis toe nie. Die polisie ondersoek ʼn saak van ontvoering.

Eden het ʼn grys sweetpakbroek met pampoenpatrone en ʼn oortrektrui met die woorde “Granny Sunshine” daarop, aangehad. Hy het ook ʼn grys-en-donkerblou trui aan en donkerblou-en-wit sokkies met seilbootjies daarop.

Mense met meer inligting word versoek om konst. Malepe by 082 358 8369 of 082 771 6328 of Pink Ladies by 072 214 7439 of 083 378 4882 te nader.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
wilma

Word die biduur Donderdagaand gehou of het dit reeds Woensdagaand plaasgevind?

leser

sterkte aan ouers, hou Sy Hand vas, Hy sal help.
soos ek met ‘n ander berig gesê het, hoe kan ñ mens deesdae iemand vertrou, selfs die nanny kan dinge laat skeefloop, waar op aarde is sy nou.
Ek pleit ook dat as iemand hom ontvoer het dat die persoon/e, die pragtige kind ongedeerd sal terug besorg

NADIA

O, my genade. EK het nie woorde nie. EK hoop julle vind die pragtige seuntjie some vannig en ongeeerd. Ek dink aan julle ek sal mal word. baie baie sterkte

Ekke

Eish, jammer maar in vandag se dae KAN ‘n oppasser NIE meer in die buurt gaan stap met kinders nie. Beplan?

GM

@Genoeg is genoeg, alhoewel die meeste van ons hoop dat daar met misdaad klaargespeel gaan word, gaan die ‘werkloosheid’syfer nog verder die hoogte inskiet as hul dit sou doen. En dan sal al die hoëkoppe wat anderpad kyk, nie so lekker kan lewe nie. En wie gaan hul vuilwerk doen as hul nie hul onderdane kan opsteek nie?
Maar ja, as ek die ouers was en ek kry die persoon in die hande wat my kind ontvoer het…. Dit sal ‘n uitgerekte proses wees…

Mag Eden ongedeerd teruggevind word.