Vermiste hond veilig opgespoor ná kaping

Foto: Facebook via Kelsey Hendricks op Watershedding Western Cape.

Sasha, die vyfjarige Labrador-kruising-teef wat Donderdag vermis geraak het tydens ʼn kaping in Kaapstad, is veilig teruggevind.

Maroela Media het vroeër berig Michelle Barnard, direkteur van die hondewelsynsorganisasie Rescue Is The New Black, het Sondag aan Maroela Media gesê Sasha is vroeër die dag in die Montana-voorstad opgemerk.

“Baie mense is uit in die omgewing om na haar te soek. Ons hoop sy word gevind voor die storm ons tref,” het Barnard Sondag gesê.

Kelsey Hendricks, wat gehelp het in die soektog na Sasha, het op Facebook geskryf Sasha is kort daarna naby die lughawe gevind. Volgens Hendricks het Sasha ʼn oop wond aan haar kop gehad en is sy na ʼn veearts geneem.

Maroela Media het Saterdag berig ʼn R10 000-beloning is uitgeloof om Sasha op te spoor nadat haar 59-jarige eienaar se voertuig omstreeks 14:00 by haar huis in Rondebosch in die oprit na haar huis gekaap is.

Foto: Facebook via Kelsey Hendricks op Watershedding Western Cape.

Sasha was saam met haar eienaar in die motor en die eienaar het aan die kaper se keel vasgehou in ʼn poging om haar hond te red. Sy is ʼn ent saam met die voertuig gesleep. Die polisie het sowat tien minute later die voertuig by die aansluiting van Robert Sobukweweg en Valhallarylaan in Valhallapark voorgekeer en die verdagte in hegtenis geneem. Dit is toe dat Sasha uit die voertuig gespring en weggehardloop het.

Sasha se eienaar sterk steeds in ʼn hoësorgeenheid aan. ʼn Gebreekte rib het glo deur haar long gesteek en sy het ook ander beserings opgedoen. Volgens Hendricks het sy wel ʼn foto van Sasha ontvang en kan sy “rustig slaap vanaand” [Sondagaand”].

Barnard kon ondanks verskeie pogings nie vir kommentaar bereik word nie.

Rescue is the New Black het wel op sy amptelike Facebook-blad bevestig dat Sasha gevind is. “Sasha is gevind, ʼn reusedankie aan almal wat gehelp, gebel, boodskappe gestuur en gesoek het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
Rikku

Dankie aan almal wat gehelp soek het na Sasha. Dankie Jesus dat sy veilig gevind was.

White Rhino

Ai ek is sooo bly!!

Ander Annie

So bly Sasha is veilig. Ek hoop Sasha se eienaar herstel nou vinnig en dat Sasha ook mooi gesond sal word. So bly dat sy gevind is voordat die bibber weer ons tref. Dankie aan almal wat gehelp het.

Theresa B

Ek is SO bly. Mag sy ook baie liefde en pypgoed kry vir daardie einde aan haar gesig. Bly sy en haar eienaar sal mekaar weer kan sien.

belinda

baie sterkte aan die eienaar, baie bly hond se kind is gevind