Vermiste Moti-broers tuis

Die vier Moti-broers wat met hul ouers herenig is. [Foto: Verskaf]

Die vier broers van Polokowane, Limpopo wat op 20 Oktober verdwyn het toe hul motor gekaap en hulle ontvoer is, is  veilig met hul ouers herenig.

Dié nuus is Donderdagoggend vroeg op Auto Moti se Facebook-blad aangekondig – oënskynlik deur die ouers self. Dit is ook deur brig. Vish Naidoo, nasionale polisiewoordvoerder, bevestig.

“Die ouers van Zia (15), Alaan (13), Zayyad (11) en klein Zian (6), Naazim en Shakira Moti, is verheug oor die terugkeer van hul vier seuns,” lui die inskrywing op die blad van Naazim se onderneming.

“Ons spreek ons opregte dankbaarheid uit teenoor die Suid-Afrikaanse Polisiediens, ons politieke partye, die media, sosialemediabeïnvloeders en almal wat vir die veiligheid van ons kinders gebid het. Ons is dankbaar dat hulle vrygelaat is en toe ons die oproep ontvang dat ons die kinders kan gaan haal, het ons ons vol hoop na die toneel gehaas.”

Die ouers het die inskrywing afgesluit deur vir “privaatheid” te vra en aangedui dat hulle oor ʼn paar dae met die media sal praat.

“Ons sien uit om as ’n familie te genees en sal ʼn bietjie privaatheid vir ʼn rukkie waardeer.”

Volgens Naidoo het die polisie in Vuwani, Limpopo, Woensdagaand ʼn oproep van ʼn plaaslike inwoner ontvang dat die kinders by dié se huis opgedaag het nadat hulle glo op ʼn nabygeleë pad afgelaai is.

“Die polisie het ʼn mediese dokter gereël wat bevestig het dat die kinders in goeie gesondheid verkeer voordat hulle aan hul ouers oorhandig is. Dit het ook geblyk dat die kinders in ʼn goeie luim was tydens die hereniging met hul ouers.” Naidoo sê die kinders is nog nie ondervra nie, maar dat polisiesielkundiges Donderdag bystand in dié verband sal bied. “Die ontvoering-ondersoeksaak duur steeds voort en ons doen ʼn beroep op enigiemand wat kan help met inligting om die ontvoerders vas te trek om asseblief die polisie te kontak.”

Maroela Media het vroeër berig die seuns was op die betrokke dag omstreeks 07:00 van hul huis in Nirvana op pad na Curro Heuwelkruin, toe hul silwergrys BMW gekaap en die broers ontvoer is.

Die polisie het vroeër gesê dat sewe mans met wit oorpakke uit ’n Kia Sorento en Mercedes-Benz geklim en skote op die BMW afgevuur het. Die seuns is toe glo uit die BMW in die Mercedes gedwing en later in ’n Toyota Fortuner oorgelaai.

Dit is nie duidelik of ’n losprys ooit geëis is nie.

*Hierdie is ʼn ontwikkelende storie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
AmY

Dis fantasiese nuus.
Só dankbaar hulle is ongedeerd gevind.

Tanja

Hierdie is ń baie vreemde storie, hier is meer as net ontvoerde kinders aan die gang

Fae Fubar

Prys ons Almagtige God!

johan

Baie aspekte van hierdie saak maak geen sin nie…..

Werner

Wonder of dit regtig n ontvoering was.