Vermiste vissermanne: Nog ʼn liggaam gevind

ʼn Liggaam van een van die agt vissermanne wat sedert Sondag vermis word nadat hul boot in die see naby Kaap St. Francis in die Oos-Kaap omgeslaan het, is Woensdag gevind.

Sers. Majola Nkohli, woordvoerder van die polisie, het gesê die lede van die reddingspan het omstreeks 09:00 gesien hoe ʼn liggaam in die see naby Blue Horizon Bay in Port Elizabeth dryf. Die liggaam is uit die water gehaal en na die hawe by St. Francisbaai geneem.

“Die persoon is intussen as Mbongeni Gift Zulu (43) van Jeffreysbaai geïdentifiseer. Zulu was een van die vissermanne wat Sondag vermis geraak het,” het Nkohli gesê. ʼn Geregtelike doodsondersoek word gedoen.

Maroela Media het vroeër berig ʼn tjokka-boot met 16 vissermanne aan boord het Sondag omstreeks 03:30 in die see by Thyspunt omgeslaan. Sewe vissermanne is later lewend op ʼn strand gevind en ses van hulle is gehospitaliseer. Een van die vissermanne se liggaam is Sondag langs die kuslyn naby Sunset Rocks gevind.

Nkohli het ʼn dringende beroep gedoen op enige vrywilligers wat bereid is om met die soektog te help, om kapt. Johan Du Toit by 071 475 1831 te kontak. Die soektog na die oorblywende sewe vissermanne duur voort.