Vermoorde boer was in geskil oor grondbesetting gewikkel

Stefan Smit

“Ons kan nie voortgaan op hierdie pad van selfvernietiging nie.”

Só het Ivan Meyer, Wes-Kaapse minister van landbou, gesê na die moord Sondagaand op die wynboer Stefan Smit (62) van die Louiesenhof-wynlandgoed buite Stellenbosch.

Meyer het gesê die land se kosmandjie is onder geweldige druk weens aanvalle en dat landelike gemeenskappe om hulp smeek. “Dit kan nie so aangaan nie. Dit is tragies wat in landbou en landelike gebiede gebeur.”

Smit is omstreeks 18:50 doodgeskiet nadat vier gewapende mans deur ʼn oop deur toegang tot die plaashuis verkry het. Sy vrou en ʼn familievriend was ten tyde van die aanval ook in die huis maar het die aanval oorleef.

Smit was die afgelope tyd in die nuus nadat onwettige besetters op die plaas Watergang toegesak het en Smit en die ander eienaars van die plaas die Wes-Kaapse hooggeregshof genader het om ʼn uitsettingsbevel te kry.

Watergang, ʼn stuk grond wat in ʼn familietrust is en die Louiesenhof-wynlandgoed insluit, word al vanaf vroeg Augustus beset en ondanks die uitsettingsbevel wat toegestaan is, is daar voortgegaan om die grond langs die Kayamandi-woonbuurt te beset.

Smit het in Maart vanjaar in ʼn onderhoud met The New York Times gesê dat hy doodsdreigemente ontvang het na aanleiding van die hofaksie.

Agri Wes-Kaap het intussen sy skok oor die moord uitgespreek. “Agri Wes-Kaap versoek president Cyril Ramaphosa om sy uitsprake op Dinsdag 9 April by Beyerskloof in Stellenbosch te verduidelik toe hy gesê het wit landbouers het ʼn toekoms in die land en dat hy wil keer dat hulle die land verlaat.

“Agri Wes-Kaap wil ook by mnr. Ramaphosa weet hoe ʼn organisasie soos Agri Wes-Kaap produsente moet aanmoedig om in ʼn land te bly waar hulle en hulle plaaswerkers se lewe elke dag bedreig word.”

Die Stellenbosch-munisipaliteit het die sinnelose moord ten sterkste veroordeel en sy meegevoel met Smit se familie betuig

Lt. kol. André Traut, woordvoerder van die polisie, het vroeër gesê hulle is op die spoor van vier verdagtes wat met persoonlike besittings op die vlug geslaan het.

Die polisie ondersoek ’n saak van moord en huisroof. Enigiemand met inligting oor die voorval word versoek om die Stellenbosch-polisie te kontak by 021 809 9140 of 021 809 9142.

Die moord op Smit is die tweede plaasmoord in minder as ʼn maand in die Wes-Kaap. Tool Wessels is verlede maand dood nadat hy en sy vrou op hulle plaas, Kapteinsdrift, naby Bonnievale aangeval is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

73 Kommentare

jongste oudste gewildste
Blaarman

Stefan Smit is ‘n held wat uit beginsel uit gronddrype teengestaan het.

Mag hy rus in vrede.

Attie

Daar is organisasies wat hul doel maak om moeilikheid te stook op plase in die Boland.

marous

Laat ons prontuit wees . Dit is die direkte gevolge van die uitlatings van die president van die land en sy gesante . Punt

Jakkie

… maar bekende wynmakers soos Beyers Truter en Jan Boland Coetzee skaar hul by die ANC en loop hand op die blaas met die prez en sy comrades. Wonder hoe hul voel oor ‘n mede-boer en buurman van hul omgewing se moord. Kort voor die verkiesing selfs ‘n dag gereël op Truter se plaas om die prez ‘n spreekbeurt te gee om die ANC op te hemel. Wat se Truter en Jan Boland nou. Kon een van hulle gewees het.

Henk du Toit

Ten alle koste moet die Wes-Kaap gedestabiliseer word. Hoeveel moet dan nou nog sterf agv populistiese uitsprake?