Verskeie hoës by Zuma-verhoor

Oudpres. Jacob Zuma voor die aanvang van Maandag se hofverrigtinge. (Foto: Rogan Ward/AFP)

Oudpres. Jacob Zuma sal volgens sy regsverteenwoordiger onskuldig pleit op die aanklagte teen hom wanneer die saak op 26 Mei in die Pietermaritzburg-hooggeregshof begin.

Die saak is Maandag weer uitgestel nadat Zuma se regspan gevra het dat adv. Billy Downer SC hom as aanklaer aan die saak onttrek. Die saak is uitgestel sodat die staat eers na die betrokke verklaring daaroor kan kyk.

Zuma staan tereg op 16 aanklagte, waaronder bedrog en rampokkery, wat verband hou met die 1999-aankoop van vegvliegtuie, patrolliebote en weermagtoerusting van vyf Europese wapenvervaardigers – destyds ten bedrae van sowat R30 miljard.

Die 79-jarige Zuma was destyds pres. Thabo Mbeki se adjunk en word daarvan beskuldig dat hy omkoopgeld van nagenoeg R4 miljoen van een van die maatskappye, die Franse wapenvervaardiger Thales, ontvang het. Thales is ook ʼn beskuldigde in die saak.

Oor die afgelope 20 jaar is die saak al tallose kere uitgestel terwyl Zuma ʼn string aansoeke ingedien het om die aanklagte teen hom te laat vaar.

Sowat drie weke gelede het al sy regsverteenwoordigers hulle onttrek sonder om enige redes te verskaf en daar was vanoggend kommer daaroor of ʼn gebrek aan verteenwoordiging tot nog ʼn vertraging in die saak sou lei.

Zuma, wat die verhoor vantevore as ʼn “politieke heksejag” bestempel het, is wel verteenwoordig deur adv. Thabani Masuku.

Masuku het aan die hof gesê hulle is gereed om met die verhoor voort te gaan en dat Zuma “nog altyd gereed was”.

Bykans almal in die hofsaak het opgestaan toe die oudpresident, geklee in ʼn donkerblou pak, die vertrek binnegekom het. Zuma het in reaksie sy hande voor sy bors vasgeklem.

In die openbare galery het ʼn man gesing “long live Jacob Zuma, long live”.

Die minister van openbare werke en infrastruktuur, Patricia de Lille, sou na verwagting die eerste persoon wees om te getuig. De Lille was in die hof, maar is verskoon.

Talle polisielede is ontplooi en heelparty Zuma-ondersteuners het buite die hof saamgedrom.

Ook die ANC se geskorste sekretaris-generaal Ace Magashule het die verrigtinge bygewoon. “Ek is hier om my steun vir pres. Zuma te wys,” het Magashule gesê, terwyl hy die verhoor terselfdertyd as “so polities” afgemaak het.

ʼn Skare ondersteuners, geklee in geel T-hemde van die regerende party en met wapperende ANC-vlae, het buite die hof gedreunsing.

“Ons moet pres. Zuma toelaat om met grasie en waardigheid tuis te rus,” het Supra Mahumapelo, voormalige premier van Noordwes, gesê. Mahumapelo het ook die saak bygewoon.

Hy sê Zuma het “deurlopend volgehou niemand is verhewe bo die reg nie. Hy het hom nog altyd aan die reg onderwerp. Op sy gevorderde ouderdom moet hy egter toegelaat word om in die vergetelheid te verdwyn  terwyl ons as samelewing aanbeweeg”.

Ook Tony Yengeni, ʼn lid van die ANC se nasionale uitvoerende komitee, Duduzane Zuma, Zuma se seun, en Carl Niehaus, woordvoerder van die uMkhonto we Sizwe- militêre vereniging, het die verrigtinge bygewoon.

Bykomende bron: AFP

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

25 Kommentare

Gert K ·

Klink of dit ‘n lekker rampokker reunie was daar by die hof.

tweeling ·

Plaas hulle een groot hofsaak gemaak het want daar is so baie kriminele in een hof bymekaar. Duidelik verstaan die hoipeloi nie wat is die verskil tussen reg en verkeerd nie. As jy baie verkeerd gedoen het maar jy is oud dan word jy sommer outomaties onskuldig bevind. Daar word gedurig gehammer oor die kere wat die saak uitgestel word maar wie is die rede daarvoor.

Anoniem ·

Ek lees elders dat Zuma dreig dat hy die ANC se “diep geheime” op die lappe sal bring indien daar voortgegaan word om hom te vervolg.

Pierre ·

Kan ek raai iemand in die party sal seker “Groot geskok” wees dan

tweeling ·

Wel, almal weet die een geheim wat sogenaamd nie te duidelik was nie is dat hulle almal korrup is, dis net die diepte wat verskil, so miskien sal hy vir ons sê hoe diep die korrupsie loop.

Jaco ·

Die hof en die staatsaanklaer en die regter werk almal vir die dept van justisie wat deur die ANC regering beheer word. Terselfdertyd in klomp ANC mense teenwoordig wat vir Zuma ondersteun. So eintlik is dit die ANC teen die ANC. Vreemd. Dié hele ding kan binne 1 week se administrasie alles binne die ANC-huis afgehandel word. Skryf dit net af.
As die saak gaan oor korrupsie en geldmors moet ALLE parlementslede en munisipale raadslede van ALLE politieke partye in die beskuldigdebank wees. Almal kry reusagtige salarisse plus luukse motors plus vet petroltoelaes. Maar werk hulle nou baie hard daarvoor?

Samuel ·

Die Staatsaanklaer, Billy Downer, werk beslis nie vir die ANC nie, daarom dat hulle wil hê hy moet hom van die saak onttrek!!!

Jaco ·

Die staatsaanklaer se salaris word deur die ANC beheerde dept van justisie betaal

Jakes ·

Nou word die saak weer verwys na die landroshof. Die sirkus hou net nooit op nie. Nogal verbaas om te sien dat al die comrades wat eintlik in oranje pakke moet wees, ook by die hof was.

Sarel ·

Dit bly ‘n sirkus…gasn seker dieselfde gazn by Magashulr

Surfer ·

Maskers mooi op hul plek en staan ten minste 1,5m uitmekaar. Mooi julle, goeie voorbeeld.

Jerry ·

Haha ja die kaders maak net seker watter vure volgende dood geslaan moet word!

Vonkprop ·

Hy is soos ‘n kleuter wat dit kon regkry om een liedjie te leer en nou sing hy dit oor en oor, want dit is al wat hy kan doen. En arme Carl Niehaus is so uit ritme uit dit doen heeltemal afbreek aan hierdie uiterse profesionele optrede by die ANC Gaan Groot konsert 2021 Volume 34. Hy is nou wragtig ‘n One Hit Wonder.

Klipkop ·

Al die voormalige bandiete en terroriste hou weer reunie.

Gert ·

Die wat daar was het gekom om te hoor of hy dalk hul geraamtes uit die kas gaan laat.

Adam Adriaan ·

Ja die ANC sirkus het maar die grootste tent met ‘n klomp kriminele narre.

Jan Nel ·

MM – Moet die eerste sin nie lees dat dit in die Hooggeregshof is en nie in die Landdroshof soos julle meld nie?

Christel Cornelissen ·

Dagsê Jan Nel
Baie dankie vir jou boodskap. Dit moet inderdaad die hooggeregshof wees. Ons vra om verskoning vir die oorsig. Die berig is sedertdien gewysig.
Groetnis
Christel
nms. Maroela Media

SjN ·

Vevang die word hoes met kriminele, Dan is die berig meer verstaanbaar.

Anoniem ·

Kan hulle nie maar al hierdie rampokkers opsluit nie……………………..moet net nie vir Careltjie vergeet nie!!!

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.