Verskeie studentebetogings in Pretoria verwag

Betogings by die Tshwane Universiteit van Tegnologie (Oktober 2015) Foto: @artindira/Twitter

Betogings by die Tshwane Universiteit van Tegnologie (Oktober 2015) Foto: @artindira/Twitter

Die #OutsourcingMustFall-beweging het Sondag gesê betogings sal vandeesweek by die Tshwane Universiteit van Tegnologie (TUT) hervat, indien die instansie steeds “bestaande ooreenkomste” gaan verontagsaam.

“Ons het ʼn ooreenkoms waarvolgens betogings opgeskort is dat werkers se lone met onmiddellike effek tot R5 000 verhoog sal word,” het Mametlwe Sebei, woordvoerder van #OutsourcingMustFall, aan verslaggewers in Pretoria gesê. Hy het gesê die instansie sal ook begin inkontrakteer en die kwessie van R10 000 wat hulle eis, sou ook na ʼn taakspan verwys word.

Sebei het gesê die ooreenkoms sluit ook klousules in dat geen werknemers, wat deur privaat kontrakteurs aangestel is en dienste aan TUT lewer, gestraf of geviktimiseer sal word vir hul betrokkenheid in onlangse betogings op die kampus nie.

“Die sekuriteitskontrakteur en ander spysenieringskontrakteurs weier egter om aan dié ooreenkoms te voldoen. Hulle het gesê hulle was nie deel van die ooreenkoms nie, aangesien die ooreenkoms met TUT aangegaan is,” het Sebei verduidelik. “TUT het ʼn verpligting en ooreenkomste wat vrywillig aangegaan is, moet gerespekteer word. Indien TUT nie doelbewus optree om seker te maak dat hierdie werkers weer begin werk en dat alle TUT-kontrakteurs aan die vereiste sal voldoen nie, sal ons van Dinsdag af weer met ʼn massabetoging by TUT begin.”

Sebei het die afgelope week gesê die #OutsourcingMustFall-beweging sal koppe stamp met die departement van hoër onderwys oor toestande by Tshwane-Noord en Tshwane-Suid-kolleges. “Die departement het nog nie sy kant gebring nie. Alhoewel universiteite outonoom is en hul eie sake bestuur, val kolleges direk onder die departement. Ons stryd is direk met die departement,” het hy bygevoeg.

“Al ons betogings oor die volgende twee dae sal gemik wees teen die departement van hoër onderwys,” het hy gesê. “Ons het met die leiers en studente van hierdie twee kolleges vergader. Ons ondersoek ʼn algehele sluiting van die twee kolleges en hul kampusse totdat die departement bereid is om sy kant te bring en die kwessies met ons te bespreek.”

Die veldtog steun glo ook alle studentebetogings op kampusse, insluitend by die Universiteit van Pretoria (UP).

Vusi Mahlangu, nog ʼn woordvoerder van die #OutsourcingMustFall-beweging, het gesê ʼn reeks betogings sal die Pretoriase middestad Maandagoggend tref wanneer UP-studente, wat verlede week in hegtenis geneem is ná ʼn openbare vergadering oor die taalbeleid op dié kampus, in die Pretoriase landdroshof verskyn. “Die 27 studente wat [Vrydag] in hegtenis geneem is, sal Maandag in die hof verskyn, so daar sal betogings wees. Studente sal met busse van die Universiteit van Pretoria na die landdroshof aangery word,” het Mahlangu gesê. “Ons was betrokke in volle ondersteuning vir studente by UP in hul struggle, en ons sal ander werkers en studentebewegings ook aanmoedig om in hul getalle op te daag om die betoging te ondersteun wat ook Maandag by die UP sal plaasvind.

Die universiteit het Vrydag gesê alle akademiese bedrywighede by sy Hatfield- en Groenkloof-kampusse is opgeskort ná studentebetogings oor die taalbeleid. “Dit is in die belang van studente en personeel om die kampusse te sluit, weens dreigemente oor ontwrigting van akademiese aktiwiteite,” het die universiteit gesê. “Die universiteit sal ook toelaat dat ʼn konsultasieproses oor die taalbeleid voortduur.”

Die universiteit het gesê ʼn taaltaakspan het voorgestelde wysigings aan die instansie se taalbeleid voorgestel, waaronder dat Engels die primêre onderrigtaal in alle lesings moet wees, en dat Afrikaans en Sepedi gebruik moet word om addisionele ondersteuning aan studente in tutoriale, praktika en besprekings te bied.

Personeel en studente word versoek om hul terugvoer in ʼn e-pos aan die taakspan te stuur.

Intussen het die vakbond Solidariteit wat werknemers van die Universiteit van Pretoria (UP) verteenwoordig en wat ook duisende oud-Tukkies as lede het, vandag ʼn referendum oor die voorgestelde wysiging aan die UP se taalbeleid van stapel gestuur. Lees meer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Rynhardt

Alle betogings teen universiteite word agter die skerms beplan deur die Anc.Eise vir groter salarisse word al hoe groter totdat dinge uit se nate begin bars! SA is die wereldkampioen van betogings en stakings in die wereld!!!

John

Dat ‘n mens darem so graag nie in jou moedertaal onderrig wil word nie, is onbegryplik, nogal Engels die taal van die’ koloniale moontheid wat deur die eeue die meeste minerale vir eie gewin in Suid-Afrika gemyn het en skatryk daaruit geword het; die taal van die man wie se beelde hulle onlangs so gegrief het. Onbegryplik.

Dirk

Anc reël betogings? Maar het Anc woordvoerder nie op tv gesê sis Amerika nie? Of wat het hy gesê?

anna

wie het nou weer vir hulle n halwe gaar hoender belowe?

Renier

Word daar ooit belanggestel om te studeer. Lyk nie so nie. Lyk my n sekere bevolkingsgroep moet maar hulle eie opledingssentrum stig omvan die gemors ontslae te raak.