David Makhura, premier van Gauteng, en sy uitvoerende raad sal Donderdag die adviespaneel, wat die sosio-ekonomiese impak van die e-tolstelsel op die provinsie se snelweë moes ondersoek, se finale verslag bekend stel.
Die premier se kantoor het in ʼn verklaring gesê die verslag sal Donderdag om 12:00 tydens ʼn mediakonferensie bekend gemaak word.
Makhura het die paneel in Julie op die been gebring om die ekonomiese en maatskaplike impak van die e-tolstelsel te ondersoek. Die ondersoek het met openbare verhore gepaard gegaan.
Die paneel het sy verslag op 30 November aan Makhura oorhandig maar die inhoud daarvan is nie bekend gemaak nie.