Vertroue in polisie, howe neem drasties af

polisie-huisroof-crime

Argieffoto: SAPD/Facebook

Suid-Afrikaners se vertroue in die polisie hou aan om drasties af te neem, maar nietemin vertrou hulle die polisie meer as die howe.

Dit is die bevinding wat blyk uit ʼn meningspeiling deur Statistieke Suid-Afrika (SSA) oor hoe Suid-Afrikaners misdaad die afgelope boekjaar ervaar het.

Luidens die peiling het die persentasie huishoudings wat meen die vlak van gewelddadige misdade het die afgelope drie jaar gestyg, toegeneem. Minstens 20% van Suid-Afrikaners voel nie veilig om deur die dag in die omgewing waar hul woon rond te loop nie.

Suid-Afrikaners se tevredenheid met die polisie en die howe neem steeds af. Net sowat die helfte van Suid-Afrikaners is tevrede met die polisie in hul omgewing terwyl slegs 40% van Suid-Afrikaners tevrede is met die manier waarop howe beskuldigdes hanteer.

Tevredenheid met die polisie het in al die provinsies, behalwe die Wes-Kaap en die Vrystaat, afgeneem terwyl tevredenheid met die howe in al die provinsies, behalwe Noordwes, afgeneem het.

Luidens die peiling ervaar respondente dat eiendomsmisdaad met 5% toegeneem het. Die items wat die meeste in 2017/2018 ten tyde van huisinbrake gesteel is, is klere (32%), selfone (24%) en kos (22%).

In die Wes-Kaap is die grootste daling in misdaad teenoor individue aangemeld terwyl eiendomsmisdaad en misdaad teenoor individue die grootste styging getoon het in Noordwes.

Suid-Afrikaners se persepsie neem ook toe dat gewelds- en eiendomsmisdaad die afgelope drie jaar gestyg het.

John Steenhuisen, hoofsweep van die DA. Foto: Twitter

John Steenhuisen, DA-hoofsweep, het in reaksie op die bekendmaking van die peiling gesê Suid-Afrikaners verloor nou teen ʼn kommerwekkende tempo vertroue in die polisie. Volgens Steenhuisen word Suid-Afrikaners ook al hoe meer daarvan weerhou om hul lewens ten volle te leef weens ʼn vrees vir misdaad.

“Volgens die verslag meld meer as die helfte van Suid-Afrikaners nie inbrake by die polisie aan nie omdat hulle nie glo die polisie kan iets daaraan doen nie.”

Een uit drie Suid-Afrikaners besoek nie oop ruimtes nie uit vrees vir misdaad. “17% van huishoudings wil nie hul kinders buite laat speel nie as gevolg van dié vrees. Dit het ook tot gevolg dat 14% van respondente nie winkel toe wil loop nie.”

Volgens Steenhuisen is daar ook bevind dat slegs ʼn kwart van huishoudings glo dat die polisie binne 30 minute op ʼn noodgeval sal reageer terwyl een uit tien mense dink die polisie sal glad nie opdaag nie.

“Suid-Afrikaners verdien om in buurte te woon wat veilig is en om in ʼn eerlike polisiemag te glo. Die ANC-regering het versuim om die fundamentele regte aan Suid-Afrikaners te bied en het bewys hulle kan nie misdaad bestry nie,” het hy bygevoeg.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
PJC

Hierdie meningspeiling weerspieël presies my mening ook. Ek hoop maar ek beland nooit in ń hof nie want ek het geen vertroue in die regstelsel meer nie.

Jacques

Verbaas dit enige regdenkene mens ?

alida

Sommige SAPD lede is dan self die kriminele en betrokke by misdaad. Nie almal nie maar 80% het nie die nodige opleiding of klaringstoetse gedoen nie. Skrikwekkend hoe die regering werk skep.

Koos B

Ek vertrou hulle glad nie.Ek het ‘n dief op een dag twee keer gevang en oorhandig.Die eerste keer het hy ontsnap terwyl ek hom in hul sorg gelaat het.Die twede keer het hy na een nag in die selle 11Hoo die volgende oggend verby my kantoor geloop gelag en vir my gewaai. Op navraag by die polisie stasie reken hulle ek moet by die hof gaan hoor hoekom is hy vrygelaat.Het tot nou toe vyf jaar later nog niks van die saak gehoor nie.

Human

Vergelyk bogenoemde artikel met die SA Parlement, dan kan dit nie normaal in SA gaan nie.