VF Plus: ‘Die harde werk begin nou’

Dr. Pieter Groenewald. Foto: VF Plus

Die VF Plus het sy steun in die pas afgelope verkiesing meer as verdubbel, maar dr. Pieter Groenewald, dié party se leier, sê die harde werk lê nou eers voor.

“Sukses bring natuurlik groter verantwoordelikhede. Die VF Plus besef dit en verbind hom daartoe om sy ondersteuners, en al die mense van Suid-Afrika in groter landsbelang, met toegewydheid en harde werk te beloon,” het Groenewald in ʼn verklaring gesê in reaksie op die party se prestasie by die stembusse.

Die VF Plus het vanjaar 414 864 nasionale stemme gewerf – in 2014 was dit 165 715 stemme. Waar hy voorheen vier setels in die nasionale vergadering beklee het, het die party in die sesde demokratiese parlement tien setels. En die VF Plus word in agt van die nege provinsiale wetgewers verteenwoordig waar hy altesaam 11 setels sal beklee.

Die party kon ook vanjaar daarin slaag om in minstens 114 stemdistrikte landwyd te wen – in 2014 kon hy slegs in vyf stemdistrikte die meerderheid stemme op hom verenig.

Beslis ʼn groei in steun waarvan ander politieke partye sal kennis neem.

Maar ondanks die party se prestasie meen Groenewald steeds kiesers se stemme en steun kan nie meer as vanselfsprekend aanvaar word nie. “Ná dese kan die regering en ander opposisiepartye die VF Plus nie langer ignoreer of as irrelevant afmaak nie,” sê hy.

“Die boodskap wat die VF Plus saam met sy ondersteuners met hierdie verkiesingsuitslag uitgestuur het, is hard en duidelik: Die mense van Suid-Afrika het genoeg gehad. [Ons is] ʼn party wat sê dat die agteruitgang in die land nie langer kan voortgaan nie.

“Ons kiesers het hulle verbind tot die VF Plus se siening dat daar teruggeslaan moet word teen die beleid en vergrype van ʼn regering wat die land tot op die randjie van ekonomiese ineenstorting gelei het en onder wie menseverhoudings ʼn kommerwekkende laagtepunt bereik het.”

Groenewald sê die VF Plus is daartoe verbind om hom te beywer vir selfbeskikking en die beskerming van minderheidsgroepe en om te help bou aan ʼn Suid-Afrika waarin al sy inwoners geborge en veilig kan voel met gelyke regte en geleenthede vir almal.

“Die finale uitslag van die 2019-verkiesing is die begin van hierdie pad.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

202 Kommentare

jongste oudste gewildste
Johan

Die VF+ is die dinamiese stem van die minderhede en verdien ons almal se steun.

PJ

Wel gedaan!!!!

Boerboel

Stem saam Johan. Ons hoop en vetrou dat dit die begin van goeie dinge is vir ons.

Stiks

Ditto Johan

Lollie

Net baie jammer dat daar so baie blankes is wat draad sitters is! Hulle wil ook net die bestelling vir hulle en hulle families hê maar ag dit nie belangrik om te stem nie!
Ek ken ń vrou van 73 en ń gesin van 3 wat nog nooit eers geregistreer het nie!! Pateties!
Waarom het die EFF so goed gevaar? Hulle het baie foute maar 1 ding wat ons beslis van hulle kan leer is om saam te staan! Wanneer sal blankes saamstaan? Wanneer dit te laat is!