[Video] ‘Boewe’ sak toe op huis, laat spaander ná skote

'n Skermskoot uit die video. Die video volg onderaan die berig.

‘n Skermskoot uit die video. Die video volg onderaan die berig.

ʼn Poging om by ʼn huis aan die KwaZulu-Natalse Suidkus in te breek is op kringtelevisiekameras vasgelê en wys hoe ses mans laat spaander as die huiseienaar vanuit die huis skote afvuur.

Die huiseienaar het die beeldmateriaal aan die South Coast Herald verskaf in ʼn poging om die verdagtes op te spoor. Die groep word moontlik verbind met minstens vyf inbrake in Junie in die Ifafa- en Bazley-gebied, noord van Hibberdene.

Op die beeldmateriaal kan gesien word hoe minstens ses mans op 21 Junie omstreeks 03:00 op ʼn huis in Bazley toesak.

Die South Coast Herald berig die mans het toegang tot die eiendom verkry deur oor die buurman se heining te klim. Die mans het vermoedelik een van die vensters met ʼn koevoet oopgeforseer waarna een van hulle sy hand deur die venster gedruk het in ʼn poging om die veiligheidstelsel te ontkoppel. Die inwoner het die geraas gehoor en ʼn skoot afgevuur om die indringers af te skrik.

Hulle het egter aangehou om die venster oop te druk. Die man het nóg ʼn skoot afgevuur waarna die groep met leë hande weggehardloop het.

Kapt. Vincent Pandarum, polisiewoordvoerder, het aan Maroela Media gesê ondersoek word ingestel om te bepaal of die groep met ander inbrake en voorvalle van huisroof in die streek verbind kan word.

Niemand is nog in verband met die voorval op 21 Junie in hegtenis geneem nie. Mense wat die mans op die video herken, word versoek om die Scottburgh-polisie by 039 978 1900/9918 te bel.

Bron: South Coast Herald

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Theresa

Koebaai lekker vakansietye.

tamboti

Dit lyk glad nie of die roof deeglik beplan is nie, kyk hoe loop hul rond en bekyk alles, die veiligheidskamera en al. Die “””””verdagtes””””” het nie baie beplanning nodig nie – een lyk of hy sommer van die (drank)winkel af kom met inkopiesak.
Ons soek ingewikkelde oplossings vir primitiewe probleme!

henk

laat ek raai, die polisie gaan hierdie kriminele soek tot al ses opgespoor is. dan gaan hulle ses klagtes van poging tot moord registreer en die huis eienaar summier toesluit!

Chris

Poging tot ses moorde en die klag daarby gevoeg, die afvuur van n vuurwapen in dorps gebied

Ben

Koop ‘n paar buiteligte met sensors wat jy enige plek kry. Ek het ‘n paar 240-Volt “Buzzers” of “Beepers” ingelas by die lig se bedrading. Dus as die lig/sensor ‘n liggaam optel en ligte aanskakel, skreeu die Buzzer/beeper en die rowers laat spaander. ‘n Uil laat dit ook afgaan soms, maar dit pla nie my nie. My hond en ek gaan kyk met plesier.