Video: Chaos buite Brackenfell-skool toe EFF, inwoners slaags raak

Inwoners en ondersteuners van die EFF raak slaags buite die Hoërskool Brackenfell. (Foto: ANA)

WAARSKUWING: Die video in hierdie berig bevat kru taal.

Die polisie moes Maandag ingryp nadat ondersteuners van die EFF en ouers en inwoners van Brackenfell slaags geraak en skote en vuiste geklap het.

Lede van die EFF het Vrydag al na die Hoërskool Brackenfell opgeruk ná foto’s van matriekleerders van die skool by ʼn sogenaamde matriekafskeidgeleentheid ʼn herrie op sosiale media veroorsaak het. Net wit leerders het glo die geselligheid bygewoon.

Die betogers was Maandag weer by die skool, waar private veiligheidswagte, inwoners en ouers hulle ingewag het.

Die polisie is ook by die skool ontplooi.

Neil de Beer, stigter van die United Independent Movement (UIM), het teen die EFF uitgevaar en gesê dit is skandelik dat nog geen politieke leier die skool kom besoek het nie. Hy het gesê hy het die speaker van die parlement, Thandi Modise, boonop gevra om stappe te doen teen die partyleiers wat geweld aanhits.

“Dit is nie ʼn rassekwessie nie, dit is ʼn kwessie oor die reg van kinders om in vrede gelaat te word. Gaan sê jy vir die mense van Suid-Afrika ons is #gatvol.

“Elke keer dat Julius Malema iets sê, moet die wêreld luister. Nou wie het hierdie klein mannetjie ʼn godjie gemaak?”

Minstens een mens is weens die oproer buite skool in hegtenis geneem. Die polisie monitor steeds die situasie. (Foto: ANA)

De Beer sê die aanhitsing om “te vermoor, te brand en dood te maak” is ongrondwetlik en kom neer op haatspraak. “Dit is onaanvaarbaar komende van ʼn sogenaamde leier van die parlement.”

De Beer het ontken dat die inwoners van Brackenfell rassisties is. “Hulle moet werk, maar hulle staan hier om hul kinders te beskerm,” het De Beer gesê. “Hierdie land is moeg vir iemand wat ʼn land probeer verdeel, pleks daarvan om dit te verenig.”

Sers. Noloyiso Rwexana, polisiewoordvoerder in die Wes-Kaap, het gesê lede van die eenheid vir openbare orde en ander wetstoepassingsowerhede is ontplooi om die situasie dop te hou. Verskeie paaie om die skool is ook gesluit.

Rwexana het gesê ʼn lid van die publiek het glo skote geskiet en ʼn saak van poging tot moord is vir ondersoek aanhangig gemaak.

“ʼn 39-jarige verdagte is in hegtenis geneem,” het Rwexana gesê.

“Die polisie het opgetree om die skare uiteen te jaag. Geen beserings is aangemeld nie en geen ander inhegtenisnemings is in hierdie stadium gedoen nie.”

Rwexana het ook gesê ʼn saak van openbare geweld word ondersoek. Die polisie is intussen steeds op die toneel om die situasie dop te hou.

Bronagh Hammond, woordvoerder van die Wes-Kaapse departement van onderwys, het vroeër gesê die skool het weens die Covid-19-pandemie geen matriekbal aangebied nie en die skool het ook niks met die organisering van die betrokke geleentheid te doen gehad nie.

Die skool het Sondag in ʼn brief aan ouers ook weer benadruk dat die geleentheid nie ʼn sogenaamde “wit matriekafskeid” was nie en dat dit nié deur die skool gereël is nie.

“Die beheerliggaam het etlike maande gelede al besluit dat daar nie ʼn matriekafskeid gaan wees nie, omdat die gevaar van die Covid-19-pandemie net te groot is. Die gemaskerde bal, waarna as ʼn matriekafskeid verwys is, was ʼn private partytjie wat deur ouers van matrikulante gereël is, en was geensins onder die beheer van die skool nie,” het die skoolhoof, JW Muller, en die voorsitter van die beheerliggaam, dr. Guillaume Smit, in ʼn verklaring gesê.

“Iets positief wat uit al die negatiwiteit na vore kom, is hoe ons ouers en die Brackenfell-gemeenskap bankvas by ons staan. Ons wil julle bedank vir jul lojaliteit en ongelooflike steun in ʼn moeilike tyd.”

Die skool sê hy distansieer hom van enige aantyging dat sekere geleenthede vir bepaalde groepe, veral rasgroepe, gereserveer word.

Die skool het ook ʼn beroep op ouers gedoen om hulle te weerhou van gewelddadige optrede of gedrag wat die skool onder verdere druk sal plaas.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

58 Kommentare

jongste oudste gewildste
Trotse Boervrou

Dit is mos nou hoe mens oor kleurgrense saamstaan! Well done!

Veronica

duidelik het iemand genoeg gehad!!!!! mooi man, dink mos as hulle met rooi opdaag iewers almal moet bang wees ek net bly niemand beseer nie

Fedup

Now i am not really a violent person and no violence will ever solve any problem.
But…
As we are seeing the garden gnomes getting a hair wash without shampoo, i would have reacted exactly the same as the parents.
Or worse.

Pieter

Die EFF gaan op die harde manier leer dink hulle kan maak nes hulle wil. Die ANC het malema mooi geleer. Hier gaan nog oorlog kom praat help nie met die klomp kommuniste nie.

Natasha

As die regering en Cele nie die EFF kan beheer nie sal ons die publiek dit doen.