Video: Duisende bale voer ‘aan die brand gesteek’

Sowat 2000 bale was die afgelope naweek op Elmien en Corné Kriek se plaas in vlamme gehul. (Foto: Verskaf)

Sowat 2 000 bale voer is Sondag in ʼn brand op ʼn plaas naby Meyerton, Gauteng, vernietig. Elmien Kriek en haar man, Corné, glo die voer is opsetlik aan die brand gesteek.

Kriek het Sondag video’s van die voorval op Facebook en TikTok gedeel wat sedertdien wyd versprei het.

“Dis wat die land se mense aan jou doen. Al ons voer, 2 000 bale, gone,” het sy huilend in een van die video’s gesê.

Volgens Kriek het sy en haar man Sondag omstreeks 03:00 ’n oproep van die buurplaas ontvang dat hulle voer aan die brand is. Die egpaar bly sowat 7 km van dié familieplaas af.

“Ek en Corné het dadelik soontoe gejaag en was gereed om bale wat dalk nog gered kan word te skuif.

“Tot ons verbasing was al die bale en skure reeds in ligte laaie. Elke liewe hoop was aan die brand gesteek.”

Kriek sê dat ’n afsonderlike brand reeds Saterdagaand op die plaas “gestig” is, maar deur familielede geblus is voordat dit die voer bereik het.

Al die bale asook die skure is in die brand vernietig. (Foto: Verskaf)

Sy vermoed dat die brand moontlik met die toemaak van ’n sjebien naby dié plaas verband hou, hoewel hulle geen bewyse het om dit te staaf nie.

“Die Meyerton-polisie het Saterdagaand ’n sjebien in ’n onwettige plakkerskamp naby ons plaas besoek en toegemaak.”

Volgens Kriek het hulle die polisie Sondag na die plaas ontbied om ’n saak van brandstigting aanhangig te maak, maar kan dit glo weens ’n tekort aan bewyse nie ondersoek word nie.

Konst. Tlaleng Moloi, polisiewoordvoerder, kon dit nie by navraag bevestig nie.

Brandweerdienste was volgens Kriek binne minute op die toneel en op bystand indien die brand verder sou versprei.

Die brand het sowat 2000 voerbale vernietig. (Foto: Verskaf)

“Die voer wat gebrand het, het ons sedert die begin van die jaar bymekaargemaak sodat ons beeste genoeg voer sal hê om hulle tot die volgende reënseisoen deur te dra.”

Die organisasie Boere Droogtehulp SA NPC het vandeesweek ingespring om hulp te verleen deur twee vragte voer te skenk.

“Ons het gister (Dinsdag) 105 bale van 1m3 elk afgelaai. Dis maar ’n druppel aan die emmer, maar ten minste kan hulle weer voortgaan. Ons beplan om later met nog bale te help.

Die organisasie, Boere Droogtehulp SA NPC, het 105 voerbale geskenk. (Foto: Verskaf)

“Ons besef die skok en groot hartseer agter so ’n gebeurtenis en daarom het ons besluit om hulle by te staan. Om nie te weet wat jou diere môre gaan eet nie is ’n enorme, hulpelose gevoel. Dis amper onmoontlik om dié gevoel te beskryf,” sê Chris van Beljon, bestuurder en stigter van dié organisasie.

“Ons kan ons dankbaarheid nie genoeg betuig nie. Julle is engele gestuur om ons te help,” het Kriek oor Boere Droogtehulp SA se skenking gesê.

Volgens Kriek is hulle ook deur verskeie ander lede van die gemeenskap bygestaan.

“Daar is so baie mense wat ons te hulp gesnel het, vreemdelinge wat nou vriende geword het.”

Posted by Elmien Kriek on Sunday, June 20, 2021

 

 

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Elize

Mens kan sulke onmenslikheid nie begryp nie!!! Dit raak net te veel maar dis mense wat sulke dinge doen wat eerste bakhand sal staan vir kos. Wat se haat dryf jou???

Snowball

Alles deel van die ANC se verskroeide aarde beleid.

JM

Die skuldiges sal hul dag kry God slaap nie.

E

Kry tog nou net sekuriteit of iets, want anders doen hulle dit net weer. Nou moet die mense vir sekuriteit ook betaal.

Chantel

Hoe siek is dit nie!!!!! So jammer vir julle verlies.