Video: Duisende kyk al na St. Lucia se snuffelende seekoei

Op soek na ‘n snoephappie in St. Lucia. Duisende mense het reeds na die video van die seekoei gekyk. (Skermgreep: Facebook)

Caltex het ʼn haas, Lacoste het ʼn krokodil en die OK Express op St. Lucia in KwaZulu-Natal het ʼn seekoei.

Bykans ʼn halfmiljoen mense het reeds na ʼn video van ʼn seekoei gekyk wat doodluiters en al snuffelende na die rybaan van die Engen-vulstasie op die dorp stap. Die OK Express-winkel by die vulstasie het die video op sy Facebook-blad gedeel, waarna dit soos ʼn veldbrand versprei het.

“Net ʼn rustige Sondagaand-staptog in St. Lucia op soek na snoephappies by die OK Express,” lui die inskrywing op Facebook.

Marié Stubbe, oordbestuurder van Lake View Cabanas en ʼn jarelange inwoner van die dorp, het die video Sondagaand geneem nadat sy van vriende af op pad huis toe was.

“By ons is diere in die strate ʼn alledaagse verskynsel. Ons sien gereeld diere soos nag-apies en muskeljaatkatte, maar die seekoeie het die grootste aantrekkingskrag.

“Die diere gee ʼn ander betekenis aan St. Lucia se ‘naglewe’,” het Stubbe geskerts.

“Omtrent almal op die dorp het al ʼn video van ʼn seekoei op Facebook gedeel. Ek weet nie hoekom hierdie een so mal gegaan het nie.”

Sy sê daar is tans ook ʼn vlakvark wat gereeld in die dorp opgemerk word.

Stubbe sê by die oord waar sy werk, waarsku sy gewoonlik nie haar gaste teen misdaad nie, maar eerder dat hulle op die uitkyk vir seekoeie in die straat moet wees.

Sy sê die meeste mense is gewoond aan die diere en laat hulle begaan. Dit bly egter wilde diere wat onvoorspelbaar kan reageer as hulle skrik.

Stubbe sê nadat die seekoei ʼn draai by die vulstasie gegooi het, het die dier rustig weer weggestap.

Die seekoeie woon in die iSimangaliso-vleilandpark, ʼn wêrelderfenisgebied.

Just a casual Sunday night stroll in St.Lucia looking for snacks at OK Express ???????? The hippo returned back to the lake after grazing around town. St.Lucia town is surrounded by a large lake and extensive natural habitat for wildlife. #stluciaestuary #okexpress #engen Engen SA

Posted by OK Express at Engen St.Lucia on Sunday, 23 February 2020

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

3 Kommentare

jongste oudste gewildste
Ronel

Ons gaan hou gereeld vakansie in St. Lucia. Die oord waar ons tuisgaan het ‘n seekoei wat so paar meter van die swembad se hek af slaap.

ogies1

Daardie seekoei is altyd daar! het daar gebly! hy is al n ou inwoner en almal ken hom al.