[Video en foto’s] Betogings vlam weer op by universiteite

Studente betoog op die Universiteit Kaapstad-kampus. Foto: Twitter via @UCTMSA

Studente betoog op die Universiteit Kaapstad-kampus. Foto: Twitter via @UCTMSA

Na aanleiding van die departement van hoër onderwys se aankondiging dat universiteite self kan besluit oor fooiverhogings in studiegeld vir volgende jaar, het betogings weer by verskeie kampusse oor die hele land uitgebreek, hierdie keer onder die vaandel van #FeesMustFallReloaded.

Studente by die Universiteit van die Witwatersrand (Wits) het Maandag gedreig dat hulle die universiteit tot stilstand sal bring indien die universiteit studiefooie verhoog. Die studente eis dat studiefooie onveranderd bly tot die regering gratis tersiêre onderrig instel. Studente het Dinsdagoggend weer akademiese bedrywighede op die kampus ontwrig en groepe betogers het oor die kampus beweeg om ander studente te mobiliseer om aan die protesaksie deel te neem. African News Agency het berig dat tien studente vanoggend op die kampus in hegtenis geneem is.

'n Klaskamer by die Universiteit van Pretoria waar 'n toets Maandag (19 September 2016) deur betogers ontwrig is. Foto: Verskaf

‘n Klaskamer by die Universiteit van Pretoria waar ‘n toets Maandag (19 September 2016) deur betogers ontwrig is. Foto: Verskaf

Intussen is lesings en toetse Maandagmiddag by die Universiteit van Pretoria ook deur betogers ontwrig wat klasse binnegestorm, gesing en gedans het en studente se vraestelle afgeneem het. Anna-Retha Bouwer, woordvoerder van die universiteit, het aan Maroela Media gesê daar was “enkele geïsoleerde voorvalle van protesaksies” op die kampus, maar alles was Dinsdagoggend weer rustig.

“Dit is nog vroeg, so ek kan nie seker wees dat daar vir die res van die dag niks sal gebeur nie, maar daar is tans geen ontwrigting aangemeld nie. Die nodige stappe is gedoen om verdere ontwrigting te verhoed,” het Bouwer gesê. “Alle akademiese bedrywighede gaan normaalweg voort.”

Polisiebeamptes Dinsdag (20 September 2016) op die Wits-kampus. Foto: Twitter via @ntox_luth

Polisiebeamptes Dinsdag (20 September 2016) op die Wits-kampus. Foto: Twitter via @ntox_luth

Akademiese bedrywighede moes Dinsdag ook by die Universiteit van Kaapstad (UK) hervat word, maar betogers het reeds vroeg Dinsdagoggend begin amok maak op die kampus. Betogers het om die kampus saamgedrom en ingange van die kampus afgesper. Polisiebeamptes is ontplooi om die situasie te monitor.

Op die universiteit se amptelike Facebook-blad het die universiteit gesê Baxterweg is heeltemal deur betogers afgesper, asook die noordelike ingang van die hoër kampus en die ingang van die mediese skool se kampus. Volgens die universiteit is al die roetes van kampusbussies op die laer kampus ook deur betogers afgesper. Die universiteit het egter volgehou dat akademiese bedrywighede, insluitend toetse, normaalweg sal voortgaan.

Alle akademiese bedrywighede is Dinsdag op die Bloemfontein- en Suid-kampusse van die Universiteit van die Vrystaat (UV) opgeskort weens “groeiende spanning op die kampusse en ontwrigting van akademiese aktiwiteite” deur studente wat ontevrede is oor Nzimande se aankondiging. Administratiewe bedrywighede op die Bloemfontein-kampus is ook opgeskort.

Die universiteit het in ʼn verklaring gesê die senior leierskap van die universiteit het besluit om die akademiese bedrywighede op te skort om die bestuur kans te gee om met die studenteraad gesprek te voer.

Alle bedrywighede op die universiteit se Qwaqwa-kampus gaan normaalweg voort.

In die onderstaande video kan gesien word hoe betogers Maandagaand ‘n klas op die Tuks-kampus ontwrig:

[wpvideo uTt9ZXcx]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
abba

Dit is mos wat De La Rey wil he. Toon julle griewe- Toon julle griewe en sy is Okay daarmee. kan hulle mos nie vasvat nie – groot maatjie van ou Wim. Groot maatjie. ook mos anti-Afrikaans. Sy verkies mos hierdie spul. Soort soek soort.

Moeggepraat

Wat gaan die volk vandag weer brand….

Nita

Waarom betoog studente? Hulle het gekry wat hulle wil he. Rykes moet betaal en armes kry gratis opleiding.

Denise

Wil die studente klas loop of wil hulle net soos barbare als verniel hulle het geen benul hoeveel dit kos om so n gebou tot stand te bring want hulle gee nie om nie SWAK!!!! without prejudice

Karma

‘n Paar basiese reels vir universiteitstoelating:

(i) Minimum matriek slag-vereiste: 70 % (nie 30%) nie
(ii) Bewese Engels-vaardigheid (m.a.w. jy moet die aansoek-onderhoude in Engels kan
doen)
(iii) Bewys van inkomste van ouers en/of jouself en ‘n beëdigde verklaring dat jy enige
studie-skuld na afloop van jou studies binne ‘n aanvaarbare tyd, sal afbetaal

Hierdie 3 goed sal die spul Zimbabwiërs, Mosambiekers en oor die algemeen-onnoseles wat NIE op universiteit hoort nie, summier uitskakel.