Video: Koelkop veiligheidswag fnuik transitorowers

‘n Video van die voorval is wyd versprei. (Skermgreep)

ʼn Video van  ʼn veiligheidsbeampte wat onder ʼn bende rowers uitjaag het die afgelope paar dae wêreldwyd soos ʼn veldbrand versprei – en die man wat oënskynlik so koel soos ʼn komkommer agter die stuur sit, is wyd geloof vir sy ongelooflike kalmte terwyl die skote klap.

Die video is op 22 April op die N4 in Pretoria geneem toe ʼn bende transitorowers toegeslaan het.

Brig. Vishnu Naidoo, nasionale polisiewoordvoerder, sê die verdagtes het verskeie skote op die voertuig geskiet in ʼn poging om dit tydens ʼn hoëspoedjaagtog tot stilstand te dwing.

In die video kan gesien word hoe die bestuurder van die voertuig – ʼn voormalige taakmaglid van die polisie – alles moontlik doen om die aanvallers af te skud.

Hy en sy kollega dra koeëlvaste baadjies terwyl skote in die agtergrond klap en van tyd tot tyd word ʼn kragwoord gebruik terwyl die bestuurder steeds voortjaag.

So het die bakkie na die voorval gelyk. (Foto: Twitter)

“Die bestuurder van die transitovoertuig ontwyk die rowers ʼn ruk lank, maar hou later stil en wag vir die hulle.

“Die rowers het gevlug sonder om enige geld te buit,” sê Naidoo.

Foto’s van die gepantserde bakkie wat ná die voorval op sosiale media versprei is, wys presies hoe dodelik die aanval kon gewees.

Sosialemediagebruikers was vol lof vir die man wat verseker het dat hy en sy kollega ongeskonde wegkom.

Die rowers het met leë hande gevlug. (Foto: Twitter)

Die maatskappy Fortis Pro Active Defense Solutions het in ʼn boodskap gesê die uitgelekte video het deur die wêreld versprei en dat almal bespiegel oor die identiteit van die bestuurder. Die maatskappy sê hy is oorval deur oproepe en boodskappe oor die voorval en die man agter die stuur van die voertuig.

Die maatskappy het bevestig dat hy ʼn oud-taakmaglid en nou ʼn hoofinstrukteur by Fortis is.

Hy is egter nie tans beskikbaar vir kommentaar oor die voorval nie, omdat dit nog die onderwerp van ʼn voortgesette ondersoek is.

Volgens Naidoo is niemand nog in verband met die voorval in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

27 Kommentare

Persheks Adri ·

Wel gedaan! Dis nou die opleiding wat hom kalm gehou het. Ek salueer hom!!!

Wat ‘n jammerte dat SAPS so goeie man verloor het aan ‘n andermaatskappy. Dis wat ons kort in vandag se SAPS!

Drico ·

Dis nogal opvallend dat die kollega nie weet wat om te doen nie of nie wil reageer op die opdrag wat hy gekry het om te doen nie. Die bestuurder kon net so wel alleen in die voertuig gewees het.

Willem ·

Kollega kon net sowel ‘n blompot vas gehou het , lyk nie of hy weet wat om te doen nie

twaalfboor ·

Okay Renata…. Kom vertel jy ons wat die kollega moes gedoen het tydens die jaagtog in ń gepanserde voertuig waarvan die vensters nie kon oopmaak nie? Ek persoonlik dink hyself was koelkop in die situasie.

melaney ·

Twee lewens was gespaar. Baie bly hulle weer die son kan sien opkom. Maar is dit nie nou tyd dat die vervoer van geld op ‘n beter manier geskied nie? Nie alle sekuriteits manne is gelukkig om na so ‘n jaagtog lewend weg te stap nie.

Linx ·

Die passasier makeer beslis n bietjie tactical training,maar met daardie driver werk ek sonder om 2 keer te dink buite in die veld,j Kan beslis vir die jong span n ding of 2 leer…

Vlakvark ·

Baie goed gedoen! Sal beslis ‘n baie goeie instrukteur wees. Passasier kort net ‘n bietjie opleiding…

RS ·

Dis die kaliber mens wat ons nodig het om nie net goedere te beskerm nie, maar mens ook. Welgedaan en ons hoop jy word beloon vir jou daad.

Tom ·

As ek die storie so kyk is die nie die soort persoon met wie jy moet sukkel nie……hy lyk vir my na die moeilike soort wat nie nonsens gaan vat nie!
Duidelik het daai rowers die verkeerde persoon probeer beroof……inteendeel, dink hulle was gelukkig om weg te kom,
Wel gedaan my vriend, duidelik weet jy wat jy doen.

Johan ·

Luister die video met oorfone aan. Daai klappende skote en trefslae laat jou nekhare rys. Dit gee mens ‘n beter begrip het van wat die twee manne moes ervaar.

JohanR ·

Seker hulle word nie genoeg betaal om die soort gevaarlike werk te doen nie, maar wel gedaan meneer. Weet iemand of ‘n koeel waste baaitjie nie verder op beskerm nie. Baie van die bolyf, arms en skouers het geen beskerming nie, en as daar geskiet word gaan die skurke gewoonlik vir die grootste area die bors.

Magda G ·

Hoekom doen die drywer vd voertuig se assistent niks. Hy kon mos op die rowers met die vuurwapen geskiet het. Last mens dink

ONTPS ·

As hy vanuit die voertuig wou skiet sou hy die venster moes oopdraai, en die venster is juis wat gekeer het dat hulle raakgeskiet is

Hennie ·

Dié bestuurder is ‘n volksheld! Ek sal enige tyd saam met hom in ‘n oorlog gaan veg! Briljante mens! Sy passasier lyk net heeltemal te kalm… Laat mens wonder!

Marie ·

Fantastiese koelkop met goeie opleiding. Ons land het meer sulke manne nodig. Ek hoop hy kry ‘n groot bonus van sy maatskappy, asook ‘n vryhandradio en beter ondersteunende personeel.

Werner ·

Sien die bestuurder ken sy srorie sit heeltyd en kyk wat om hom aangaan.Die ou wat saamry beteken niks behalwe om die bestuurder te pla met sy geweer weet hy nie wat om daarmee te maak nie.Dink n tweerigting radio sou baie meer effektiefwer gewees het as die selfoon.

Mad Mike die Rhodesiër ·

Ditsem! Dis nou hoe jy daardie skelms wys waar Dawid die wortels begrawe het! 10 / 10 vir daardie wegkomslag!

Gabriel Hoffman ·

Hulle 2 was baie kalmeer. My vraag is waar is die radio om te laat weet vir krisis?

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.