Video: Malema onder skoot oor AK47

Julius Malema. Foto: EFF/Facebook

Beeldmateriaal het aan die lig gekom wat wys hoe Julius Malema, leier van die EFF, klaarblyklik ʼn AK47-aanvalsgeweer afvuur.

Die beeldmateriaal is van die EFF se verjaardagviering dié naweek in die Oos-Kaap. Op die video kan ʼn mens sien hoe Malema na die kant van die verhoog beweeg en dit lyk dan of hy verskeie rondes met die geweer afvuur.

Volgens die EFF was dit egter nie ʼn regte vuurwapen nie en is geen werklike koeëls is afgevuur nie.

AfriForum het intussen bekend gemaak dat hy strafregtelike klagte teen Malema gaan indien in verband met die voorval. Marnus Kamfer, regs- en risikobestuurder by AfriForum se afdeling vir gemeenskapsveiligheid, het gesê die organisasie gaan later vandag die klagte by die Lyttelton-polisiestasie aanhangig maak.

Volgens Kamfer sal die organisasie ʼn klag aanhangig maak ingevolge art. 120 (7) van die Vuurwapenbeheerwet van 2000. “Volgens die artikel is dit ʼn misdryf om ʼn vuurwapen in ʼn beboude gebied of openbare plek af te vuur sonder goeie rede om dit te doen.”

Kamfer het gesê AfriForum sal ook ʼn klag aanhangig maak rakende die besit van ʼn ongelisensieerde vuurwapen. “Ons wil uitvind of Malema die nodige toestemming en dokumente het om in besit van daardie vuurwapen te wees.”

Die ANC Jeugliga se eThekwini-streek het intussen die polisie versoek om ondersoek na die voorval in te stel. “Dit is ons mening dat die gedrag onveilig, onverantwoordelik en ook strydig is met art. 120 (7) van die Vuurwapenbeheerwet van 2000,”het Thulisa Ndlela, woordvoerder van die Jeugliga, gesê.

“Ons doen om dié rede ʼn beroep op wetstoepassingsagentskappe om die voorval te ondersoek. Selfs vir iemand soos Malema, wat moreel in gedrang is, is die soort gedrag onaanvaarbaar en moet dit veroordeel word.”

Ndlela het gesê die Jeugliga is bekommerd dat so ʼn openbare vertoning van roekelose gedrag die pogings wat gemaak word om geweld in die land te bestry sal ondermyn.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

56 Kommentare

jongste oudste gewildste
Irma

Die engelse beskrywing ” loose canon” beskryf die oportunis baie goed. Solank hy alles deurmekaar kan krap en mense opsweep is hy in sy element. Hy kry ook soveel media dekking dat hy hom verbeel hy is baie belangriker as wat goed is vir ekonomiese stabiliteit en vooruitgang.

Alida

Dit lyk my die man is nou heeltemal van sy trollie af. Vat hom vas.

Sonette

Wonder wie die witman in die video is wat die wapen by Malema gevat het nadat Malema die wapen gevuur het? Wat maak ‘n witman by ‘n EFF vergadering?

Yster

Hiervan gaan weereens vere kom.

Estie

Ek is te bang om te vra wat hy gesing het.