[Video] Motoris glo oor k-woord in hegtenis geneem

'n Skermskoot uit die video.

‘n Skermskoot uit die video.

ʼn Video van ʼn motoris, wat hardhandig deur lede van die Johannesburgse Metropolisie uit sy motor geruk en in hegtenis geneem word, versprei soos ʼn veldbrand op sosiale media sedert dit Dinsdag op Facebook gedeel is.

Die video, wat deur Francois Nel afgeneem en op sy Facebook-profiel geplaas is, wys hoe ʼn man in hegtenis geneem word omdat hy na bewering ʼn polisiebeampte die k-woord toegesnou het. In ʼn stadium word die man se vuurwapen glo deur die polisie afgevat en die man vra Nel om hom te help. ʼn Groep mense drom deurentyd op die toneel saam om die voorval te aanskou.

Die video is sedert Dinsdag al meer as 5 200 keer op Facebook gedeel. Nel het Donderdag aan Maroela Media gesê hy het verby die toneel op die hoek van Dale- en Modderfonteinweg in Midrand gery, toe hy ʼn groot groep mense langs die straat sien saamdrom het. “Dit het vir my gelyk asof hierdie man en sy vriendin aangerand word en ek het gestop om te probeer help,” het hy gesê.

“Toe ek uitklim was die polisiebeamptes besig om die man uit die motor te probeer trek, omdat hulle hom in hegtenis wou neem. Sy vriendin was saam met hom in die motor. Twee van die beamptes het uniforms aangehad en ek kon sien hulle is polisiebeamptes, daarom het ek geweet ek kan nie inmeng nie. Ek het net my selfoon gevat en die gebeure begin afneem.”

Volgens Nel het die beamptes beweer hulle neem die man in hegtenis omdat hy een van die beamptes die k-woord genoem het. Die man het deurentyd ontken hy het ooit die k-woord gebruik en volgens Nel het die man nie die woord gebruik in die tyd wat hy [Nel] op die toneel was nie. Hy het gesê daar was wel ʼn duidelike snymerk aan een van die polisiebeamptes se nek sigbaar.

Hoofsupt. Wayne Minnaar, woordvoerder van die JMPD, het Donderdag aan Maroela Media gesê die man is deur polisiebeamptes afgetrek omdat hy roekeloos bestuur het. Nadat die beamptes hom afgetrek het, het hy hulle glo die k-woord genoem, geweier om uit sy voertuig te klim en een van die beamptes met ʼn motorsleutel in die nek gesteek.

Minnaar kon nie bevestig presies watter aanklagte teen die man aanhangig gemaak is nie, maar het gesê hy is intussen op borgtog vrygelaat en moet weer op 31 Mei in die hof verskyn. Hy kon nie onmiddellik die man se naam bevestig nie.

Volgens Nel het hy nie ʼn idee wie die man is nie en het hy geen kontak met hom gehad sedert die voorval nie. “Nadat [die polisiebeamptes] hom agter in ʼn privaatvoertuig gesit het en ek gehoor het hoe sy vriendin met ʼn familielid van hulle oor die telefoon praat, het ek gedink dit lyk asof die situasie onder beheer is en ek het gery. Ek weet nie wat gebeur het nadat die polisie hom van die toneel af geneem het nie,” het hy gesê.

[wpvideo 0PyJwpYk]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

86 Kommentare

jongste oudste gewildste
Alicia

Ja-a! Party mense sal ook nie leer nie….

m

Presies wat het hy nou gedink gaan gebeur…. party mense is so common. Wonder of daar nie ook so bietjie drank betrokke was nie, die man lyk nie lekker nie.

B

M…en wie gee jou die reg om die man te oordeel van wat ny net op n foto sien??Die polisie kan ook enige iets uit hul duim suig net om hom te arresteer..dis nie ons plek om te oordeel nie.Die storie maak inelkgeval nie lekker sin nie..

vierkleur

So dis nou hulle woord teen sy woord? Wat keer rassistiese polisie lede om blankes
links en regs te arresteer, en die aantuiging te maak die persoon het die K_woord gebruik?

Willie

Hierdie is magsvertoning, sy woord teen hulle… en glo my hulle staan saam… ek glo nie enige iemand sal sommer so optree nie… hoe gryp 20 n man net sommer so… moet my nie se dat die sogenaamde polisie beamte nie self kan arresteer… in die laaste 3 kere in om JHB was ek gestop was het die JHMP geld gesoek…. Hulle is n skande vir die gemeenskap…