Video: Oscar-onderhoud: ‘Ek wil nie my lewe in die tronk mors nie’

'n Skermskoot van die onderhoud met Oscar Pistorius.

‘n Skermskoot van die onderhoud met Oscar Pistorius.

“Ek wil nie teruggaan tronk toe nie. Ek wil nie my lewe mors deur net daar te sit nie. As ek die kans kon kry, sou ek graag minderbevoorregtes wil help soos in die verlede. Ek wil graag glo as Reeva van bo af na my kon afkyk, sy graag sou wou gehad het dat ek daardie lewe leef.”

So het die moordbeskuldige, Oscar Pistorius, gesê in ʼn eksklusiewe onderhoud met die ondersoekende joernalis Mark Williams-Thomas wat binnekort op ITV in Brittanje uitgesaai sal word.

ʼn Kort voorskou van die onderhoud is Donderdag deur World News Update op YouTube gelaai. In die kort uittreksel uit die onderhoud gesels ʼn duidelik emosionele Pistorius by ʼn tafel met Williams-Thomas.

Die onderhoud is gevoer voor die voorvonnisverrigtinge verlede week in die hooggeregshof in Pretoria. Arnold Pistorius, Oscar se oom, het vroeër in ʼn verklaring ontken Oscar of die Pistorius-familie het enige vergoeding vir die onderhoud ontvang en gesê die onderhoud is bloot gedoen om die familie die geleentheid te gee om wanpersepsies oor die saak reg te stel.

In ʼn langer uittreksel wat op The Guardian se webtuiste gepubliseer is, loop Oscar op sy stompies om Williams-Thomas te wys hy het baie min balans sonder sy prostese. Pistorius verduidelik in die onderhoud hy sou nooit, soos beweer is, ʼn deur met ʼn krieketkolf kon oopbreek indien hy nie sy prostese aangehad het nie, aangesien hy sy arms nodig het om sy balans te hou sonder die prostese.

Hy vertel ook in die onderhoud van die voorval toe ʼn vrou glo in ʼn kruidenierswinkel ingestap het waar hy inkopies gedoen het en dadelik die veiligheidsbeamptes geroep en gevra het waarom hulle ʼn moordenaar in die winkel toelaat.

M-Net en Supersport het ook die regte bekom om die onderhoud uit te saai en dit sal Vrydag as deel van ʼn spesiale Carte Blanche-program uitgesaai word vanaf 22:55 op M-Net en M-Net City (kanaal 115). SuperSport sal dit ook weer uitsaai en dit sal daarna op DStv Catch Up beskikbaar wees.

Pistorius sal op 6 Julie op ʼn aanklag van moord gevonnis word.

Die video wat deur World News Update op YouTube gelaai is:

https://www.youtube.com/watch?v=_NeYu-BUctA

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

72 Kommentare

jongste oudste gewildste
Grap

Ek dink nie hierdie ou het al sy varkies op hok nie.

Andre

Ai, as mens mos iemand se lewe geneem het dan moet jy mos die gevolge daarvan dra.

Lance

Dit is die probleem is SA …daar is geen verandwoordbaarheid of gevolge nie …dis hoekom daar gemiddeld 37 moorde per dag plaasvind en 4 verkragtings enke 1 minuut ….dit se mos alles …

Province

Ha, geen kommentaar. Ek is net hier vir die bitterbekke se galbrakery. Hulle stel nooit teleur nie.

Willie E

OSCAR….ek verstaan nou waarom die gesogte toekenning vir akteurs en aktrises ‘n “OSCAR” genoem word…die beeldjie is net BAAAIE ouer as hy, so hy is vernoem…na die beeldjie….benoeming vir beste akteur in ‘n misdaad drama reeks….