Video: Stappe gedoen teen polisieman wat vrou klap

‘n Skermskoot uit die video

’n Polisiebeampte wat op video vasgevang is waar hy ’n vrou by ’n polisiestasie deur die gesig klap, sal dissiplinêr verhoor word.

Die Gautengse polisiebestuur het die voorval ten sterkste veroordeel. In die video wat wyd op sosiale media versprei word, kan gesien word hoe ’n polisiebeampte in volle uniform ’n jong vrou deur die gesig slaan wanneer sy verby hom loop.

Die voorval het by die Tembisa‑Suid-polisiestasie plaasgevind, het brig. Brenda Muridili, polisiewoordvoerder, gesê.

“Die betrokke polisiebeampte is geïdentifiseer en die provinsiale inspektoraat het reeds die distrikkoördineerder opdrag gegee om ’n departementele dissiplinêre ondersoek teen die lid in te stel.”

Die polisie het ’n beroep op die slagoffer en ooggetuies gedoen om na vore te kom sodat ’n strafregtelike saak teen die beampte aanhangig gemaak kan word. “Die strafsaak sal na die onafhanklike polisieondersoekdirektoraat (Opod) verwys word vir verdere ondersoek.”

Lt.genl. Elias Mawela, Gautengse polisiekommissaris, het die voorval ten sterkste veroordeel en gesê dat geslagsgebaseerde geweld en vrouemoord as ’n tweede pandemie in die land verklaar is.

“Misdade teen vroue en kinders is ’n prioriteit vir die Suid-Afrikaanse Polisiediens en sal nooit geduld word nie, veral nie wanneer dit gepleeg word deur ’n polisielid wat onderneem het om te dien, te beskerm en die wet te handhaaf nie. Ek verwag ’n spoedige ondersoek na die saak,” het Mawela gesê.

Die minister van polisie, Bheki Cele, het gesê hy is bly die betrokke beampte is geïdentifiseer. Cele is oor die voorval uitgevra nadat hy Vrydag die jongste misdaadstatistieke bekend gemaak het.

“Ek wil dit baie duidelik maak dat ons nie dié tipe gedrag, hetsy uitgelok of nie, van lede van die polisie sal duld nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

34 Kommentare

jongste oudste gewildste
Casper

As ek reg kyk dan is dit ‘n blanke vrou.Het sy dalk ‘n klag ingedien teen die spesifieke lid of ander lede of dalk een van oor People.Sprekende voorbeeld was dit uit selfverdediging of was dit ‘n rassistiese voorval.

Lesly

Red ‘n nasie met die tipe. Bitter min na geen hoop op ‘n positiewe toekoms vir die land

Zombie

Vuilgoed!

casper

Die gemors dink hulle is bo die wet verhewe

Shakespeare

Niks fout nie. Net ‘n gemiddelde SAPD lid.