[Video] Tienermeisie durf ‘plaasaanvallers’ met haelgeweer aan

'n Skermskoot uit die video.

‘n Skermskoot uit die video.

Beeldmateriaal van veiligheidskameras wys hoe ʼn gesin van Limpopo Sondagaand amper die slagoffers van ʼn plaasaanval was.

Op die beeldmateriaal kan gesien word hoe die 17-jarige Su-Márie Lombard enkele meter van die gewapende mans verbystap sonder dat sy dit weet. Oomblikke later is een van die vermeende aanvallers met ʼn vuurwapen in sy hand agter haar aan.

Desire Lombard het aan Maroela Media gesê sy en haar gesin woon op ʼn plaas 10 km buite Tzaneen. Sy het die Sondagaand omstreeks 19:50 in die bed geklim. Haar man was uit om te gaan jag op die plaas. “Su-Márie het die hond buite hoor blaf en het die haelgeweer saamgeneem om ondersoek in te stel,” het sy gesê. “Ons albei weet ons mag glad nie uit die huis uit gaan as my man nie daar is nie, maar ek het nie geweet sy gaan uit nie.”

Op die video kan gesien word hoe die vermeende aanvallers by die stoep-area van die huis insluip en in die waskamer skuil. Die gesin se hond, ʼn sewe maande oue Amerikaanse veghond, kom later in en gewaar die mans in die waskamer. Hy staan ʼn ruk lank voor die deur en blaf, maar is oënskynlik te bang om hulle te storm.

Minute later kom Su-Márie om die hoek gestap met ʼn haelgeweer in haar hande. Sy loer versigtig in die toegeboude stoep rond, maar kan nie die mans sien wat agter die waskamer se deur skuil nie. Sy stap weer saam met die hond uit terug na die huis voordat een van die vermeende rowers agter haar aangehardloop kom.

“Su-Márie het in die huis ingehardloop en die veiligheidshek gesluit,” het Desire gesê. “Sy het my kom wakker maak en ek het die haelgeweer gegryp.” Desire het waarskuwingskote by die veiligheidshek uitgevuur terwyl Su-Márie haar pa gebel het om terug te kom huis toe. Een van die vermeende aanvallers het na die veiligheidshek gehardloop en dit probeer oopruk, voordat hy op die vlug geslaan het.

“Ek weet nie of hy gehoor het hoe my man aangery kom of wat nie, maar hulle het almal net skielik weggehardloop. Ons het ʼn saak van poging tot huisroof by die polisie aanhangig gemaak, maar niemand is nog in hegtenis geneem nie.”

Volgens Desire is hulle baie dankbaar dat Su-Márie niks oorgekom het nie, maar voel hulle ook bly dat hulle in só ’n situasie kon kophou. “Ons weet nou beter hoe ons so iets in die toekoms sal hanteer,” het sy gesê. “Ons het nog veiligheidskameras aangebring en kyk na ander opsies om ons eiendom meer te beveilig. Ons gesin was egter nog altyd baie paraat en baie bewus van ons veiligheid.”

Marius Jacobs van Watchdog Tzaneen het die beeldmateriaal van die voorval aan Maroela Media verskaf. Maroela Media het die spoed van die beeldmateriaal op sommige dele versnel vir die doeleindes van publikasie.

[wpvideo xxvtOEix]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

106 Kommentare

jongste oudste gewildste
Pierre Celliers

Hier gaan niks van kom nie! Polisie stel net nie belang nie.

Ben

Daardie meisie het meer durf en daad as sommige mans! Mooi gedaan meisie. Kry asb ook meer honde, maar hulle moet rof en onbeskof wees.

Francois

Ohhh, so sy mag na ‘n waskamer deur skiet, of iemand daaragter sonder dat sy weet wie daar is? Dit kon haar pa gewees het…maar Oscar mag nie….Verklaar DIT vir my?

Oom Koos

Ai ai… mense moet nie buite toe gaan as hulle onraad vermoed nie. Reël eerder ‘n verwelkomingskomitee binne die huis vir die boosdoeners.
Die meisie kan haarself gelukkig agdat sy die voorval oorleef het. Hoop sy het ‘n les of twee geleer.

Martin

Ek is jammer, maar ek dink nie dit is baie dapper nie. Eerder baie ,baie onverskillig.