Video: Twee geskors ná werker bejaarde op vloer stamp

Elize Devenish (79) na die voorval. (Foto: verskaf)

‘n Bejaarde inwoner van die Ons Tuiste-sentrum in Bloemfontein moes ʼn noodoperasie aan haar hand ondergaan nadat ʼn kombuiswerker haar so hard gestamp het dat sy op die vloer geval en ʼn been in haar gewrig gebreek het.

Kringtelevisiebeeldmateriaal wys boonop hoe Elize Devenish (79) verlede Woensdag hulpeloos op die vloer lê terwyl die werker met haar take aangaan.

Charl Devenish, Elize se seun, het aan Maroela Media gesê sy ma het ná ontbyt ʼn jogurt wat op een van die tafels agtergebly het, klaarblyklik sonder toestemming geneem.

“Een van die kombuispersoneel het haar beetgekry en sy het op die grond geval. Sy het my ma net daar gelos en toe ʼn suster gaan roep wat haar eintlik ook maar net daar gelos het,” het Charl gesê.

“Die suster het haar uiteindelik opgehelp en toe staan my ma maar daar. Jy kan sien [op die beeldmateriaal] sy is heeltemal verslae en uit die veld geslaan. Sy het daarna maar self aangesukkel na haar kamer.”

Elize het haar seun gekontak en hy is onmiddellik na die sentrum, waar die bestuur onderneem het om die voorval te ondersoek.

“Dit maak ʼn mens kwaad en gefrustreerd. Die stamp is een ding, ʼn mens kan nog sê dit was ʼn struweling al is dit beslis met opset gedoen, maar toe lê sy so lank daar en niemand doen iets nie,” het Charl gesê.

“Jy kan nie jou frustrasies, watter frustrasies dit ook al is, op dié mense uithaal nie. Die personeel wat aangestel word, ongeag of hulle kombuis- of mediese personeel is, moet empatie hê.”

Elize, ʼn jarelange inwoner van die tehuis, het aanvanklik in ʼn selfsorgkamer gewoon, maar is ná die voorval en daaropvolgende operasie na ʼn kamer in dieselfde tehuis geskuif waar 24-uur lange sorg beskikbaar is. Daar is ook geslote kringtelevisie oral in dié gedeelte.

Elize Devenish se hand na die voorval. (Foto: verskaf)

Buiten haar hand, het Elize ook haar lies met die val seergemaak. Dit veroorsaak dat sy nou sukkel om self te loop en vir eers van ʼn rolstoel gebruik moet maak. “Ek glo dit is darem net tydelik. Van die spiere het seergekry, maar wanneer dit eers herstel het, sal sy weer self kan loop,” het Charl gesê.

Hy het gesê dit gaan nou vir sy ma meer oor bewusmaking oor hoe mense behandel moet word, nie net in die tehuis waar sy woon nie, maar ook in die vele ander in Suid-Afrika waar mense staatmaak op ander vir hulle versorging.

Die kombuiswerker en betrokke suster is intussen geskors. Die uitslag van hulle tugverhore sal na verwagting later vandag bekend gemaak word.

“Ons is tevrede met die stappe wat Ons Tuiste reeds gedoen het, hulle het dadelik opgetree. Hulle het na die beeldmateriaal gekyk en begin met ʼn ondersoek,” het Charl gesê.

Hy het ook ʼn klagte by die polisie aanhangig gemaak.

Ons Tuiste is ʼn deel van die Engo-welsynsorganisasie. De Wet Claassens, uitvoerende hoof van Engo, het aan Maroela Media gesê die uitslag van die betrokke personeellede se dissiplinêre verhore sal waarskynlik later vandag bekend wees.

Claassens het gesê die organisasie betreur die voorval.

“Dit was ʼn geïsoleerde voorval wat hoogs onaanvaarbaar is. Die veiligheid van alle Engo-inwoners is topprioriteit.

“Engo sien die insident in ʼn ernstige lig en die versorging en belang van inwoners word met die nodige erns bejeën. Engo tree in alle gevalle onmiddellik op en stel alle moontlike maatreëls in plek om insidente soos hierdie te voorkom.”

Die organisasie het gesê hy sal ook ten volle saamwerk met enige ondersoek wat ná die voorval ingestel word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

97 Kommentare

jongste oudste gewildste
Anti-mishandeling

Ek haal my hoed af vir die bestuur wat dit nie net probeer toesmeer nie en stappe teen hierdie ongevoelige mense doen. Hierdie tannie kon soveel meer gebreuk het as net haar hand. As daar nou iets is wat my suur in die krop steek is dit mishandeling of dit nou mens of dier is. Tannie ek wens jou ‘n spoedige herstel toe.

C

Dit maak my sommer baie boos miskien was die tannie nog honger gewees! En die werker wou seker haar sakke vol gesteek het met dit wat oorbly. Ek sal nooit my ouer in ‘n oue tehuis kan sit nie sukkel maar eerder self om na hulle te kyk want orals word hulle so behandel. Soek net die oumense se geld dis mos al waaroor dit gaan!

EJ

Fire al twee van hulle. Sies dis n skande. Probeeer haar nie eers op help en sy is nog in n suster posisie. Skaam jou.

Oorskiet

Dis omdat sy self die kos neem wat oorbly wat sy so optree!

Puik Stormers

Swak, albei. Hoop hulle verloor hulle werk en kry nie weer by so ‘n tehuis werk nie.