Video: Woede oor ma wat glo kind laat steel

In die video kan gesien word hoe die oudste van die twee meisies ’n klant by ’n restaurant se handsak steel.

Sosialemediagebruikers is die hoenders in oor ʼn video waarin blykbaar gesien kan word hoe ʼn vrou haar kinders laat steel.

Vandat die Facebook-groep Suburban Control Centre die video Sondagaand gedeel het, is dit reeds meer as 1,6 miljoen keer gekyk en het gebruikers meer as 5 000 keer daarop kommentaar gelewer.

Kapt. FC van Wyk, Wes-Kaapse polisiewoordvoerder, het by navraag gesê die beeldmateriaal is op 11 November in ʼn winkelsentrum in die Paarl verfilm.

In die video kan gesien word hoe ʼn vrou met drie kinders by haar, twee meisies en ʼn seuntjie, naby ʼn vrou staan wat alleen by ʼn tafel onder ʼn sonsambreel sit. Die polisie wou nie bekendmaak in watter winkelsentrum die voorval plaasgevind het nie.

In ʼn stadium loop die kleuterseuntjie in die rigting van die vrou se handsak wat langs haar op die vloer staan. Hy draai dadelik om en gaan staan weer by die vrou en twee meisies.

Nadat die vier weer ʼn hele ruk lank rondstaan, kniel die oudste meisie onder die sambreel agter die vrou se stoel. Terwyl die vrou, moontlik haar ma, op haar selfoon staan en gesels, strek die meisie haar hand uit na die handsak, trek dit nader en stap ewe gelate saam met die ander drie weg.

Dis ook nie bekend hoe die video in die sosiale media beland het nie.

Die kamera volg die vier terwyl hulle wegstap, wat daarop dui dat dit beman was, maar niemand het die viertal voorgekeer nie. Dis ook nie bekend hoe die video in die sosiale media beland het nie.

Van Wyk sê die polisie ondersoek die voorval, maar “geen ander voorvalle wat verband hou met die verdagtes in die beeldmateriaal is by die Paarlse polisie voor of sedert die voorval aangemeld nie”.

Hy sê speurders volg leidrade op, maar niemand is nog in hegtenis geneem nie.

Dis hartseer dat ʼn mens kan sien hulle het dit al vantevore gedoen.

Facebook-gebruikers het met afgryse op die video gereageer. “ʼn Swaar lewe wag op hierdie kinders,” skryf ʼn vrou. “Om hulle te leer steel sal hulle in die tronk of ses voet onder die grond laat beland.”

Nog ʼn gebruiker skryf: “Dis hartseer dat ʼn mens kan sien hulle het dit al vantevore gedoen! Daai kinders is goed daarmee. En dis jammer dat dié kinders vir altyd onbetroubaar sal wees weens hul ma!”

Maar minstens een gebruiker glo nie die voorval het regtig gebeur nie. “My vraag is, wie het dit verfilm en hoekom? Hoe weet hulle reeds wat gaan gebeur? Moenie alles glo wat julle sien nie. Dikwels is dié soort nonsens vals om mense sover te kry om dit te kyk.”

Parenting at it's best! What a good example this mother is – Ladies always keep your handbags attached to your person or chair.

Posted by Suburban Control Centre on Sunday, November 25, 2018

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
Brutus

Die ma het n krimenele “mind ” nou leer sy haar kinders ook om krimenele te word. Skandelik.

Corne

Lyk nie of dit (kamera) beman was nie, die persoon wat die video afneem het net sy foon beweeg soos hulle na regs geloop het.

Eish

Indien dit waar is, kan ek nie glo dat persoon buite sit met haar handsak op die vloer!

Al

Ek glo nie die video is vals nie. Minderjarige kinders is al by huisbrake betrek.
Dis skandelik.

GM

Ek kan nie glo daar is mense wat vra: ‘Wie het dit verfilm, en hoe het hulle geweet dit gaan gebeur?’. Regtig? Dis in ‘n winkelsentrum, met KAMERA’s. Daar was al baie gevalle waar ‘ouers’ hul kinders op so ‘n manier misbruik het. Dis vir hulle aanvaarbaar.