Vier doodgeskiet wat glo transitoroof beplan het  

(Foto: SAPD)

Vier vermeende rowers is in Noordwes deur die polisie doodgeskiet nadat inligting oor ʼn beplande transitorooftog opgevolg is.

Volgens kol. Katlego Mogale, polisiewoordvoerder, het ʼn multidissiplinêre span van die polisie inligting opgevolg oor ʼn groep verdagtes wat glo ʼn transitorooftog tussen Gauteng en Noordwes beplan het.

“Die inligting is opgevolg en die verdagtes se voertuig is op die N4-hoofweg opgemerk. Die verdagtes het in die rigting van Mmakau buite Brits gery en ʼn hoëspoedjaagtog en skietgeveg het gevolg toe die verdagtes besef het hulle gaan vasgetrek word.”

(Foto: SAPD)

Die bestuurder van die verdagtes se voertuig het beheer oor die motor verloor en teen ʼn heining in Mmakau vasgejaag.

“Vier verdagtes, tussen 30 en 45 jaar oud, is tydens die skietery noodlottig gewond en die polisie het op drie ongelisensieerde vuurwapens beslag gelê.”