Vier EFF-lede vas oor Bothaville-brandstigting

Vier lede van die Ekonomiese Vryheidsvegters (EFF) het hulself aan die polisie oorgegee nadat ses huise in ʼn informele nedersetting buite Bothaville in die Vrystaat afgebrand is.

“Die persone het EFF-hemde aangehad toe hulle hulself gister [Maandag] by die Bothaville-polisiestasie oorgegee het,” het kapt. Stephen Thakeng, woordvoerdervan die polisie, gesê.

Mbuyiseni Ndlozi, woordvoerder van die EFF, kon nie onmiddellik bereik word om te bevestig of die vier wel lede van die party is nie.
Die vier sal na verwagting Dinsdag in die Bothaville-landdroshof verskyn op aanklag van openbare geweld, brandstigting, poging tot moord en kwaadwillige saakbeskadiging.

Ses huise is Vrydag in Kgotsong afebrand. Vier van die huise het aan raadslede van die plaaslike munisipaliteit behoort. ʼn Biblioteek is ook aan die brand gesteek. Twaalf mense is in hegtenis geneem en het Maandag in die Bothaville-landdroshof verskyn. Hulle saak is tot 13 Oktober uitgestel wanneer hulle na verwagting om borg sal aansoek doen. Lees meer hier.