Vier gevonnis wat mans tydens huisrooftogte martel

Speursersant Peter Makwela. (Foto: SAPD)

Vier gewelddadige rowers is elkeen in die Mokerong-streekshof in Mokopane, Limpopo, tot effektief 30 jaar tronkstraf elk gevonnis in verband met huisrooftogte wat in dié gebied gepleeg is.

Kol. Moatshe Ngoepe, woordvoerder van die polisie, sê die eerste rooftog het op 17 Maart 2016 omstreeks 07:15 plaasgevind. “’n Groep mans het by ʼn huis opgedaag en die man by die huis gevra om sakedokumente te onderteken. Hy het ingestem en hulle ingeneem na die kantoor in sy huis,” het Ngoepe gesê.

“Toe hulle by die kantoor kom, het die vier mans aggressief geraak en ʼn vuurwapen op die man gerig en geld by hom geëis. Die slagoffer het geweier totdat hulle hom met ʼn warm strykyster gemartel het en gedreig het om sy vrou dood te maak.”

Ngoepe sê die man het uiteindelik ingestem om R1 miljoen elektronies na sy twee sakevennote en sy rekenmeester oor te plaas en het hulle gevra om die geld te onttrek en die kontant na sy huis toe te bring.

Ná ʼn paar uur is die R1 miljoen kontant deur een van die man se werknemers na die huis toe gebring. “Die rowers het die kontant en ander items, insluitend juweliersware, geroof voordat hulle van die toneel gevlug het.”

Ngoepe sê die man het erge brandwonde in die voorval opgedoen. Die polisie is in kennis gestel en ʼn ondersoek is van stapel gestuur.

Op 6 April vanjaar het ʼn soortgelyke voorval by ʼn huis in Mokopane plaasgevind toe twee mans “uit die bloute verskyn het” en ʼn man oorval het net toe by die huis aangekom het van die werk af. Ngoepe vertel hulle het die man in die huis ingedwing en geld geëis.

“Hulle het hom met ʼn warm strykyster gemartel en die kluis se sleutels geëis. Ná ʼn paar ure het hulle die televisie en klankstelsel geroof en op die vlug geslaan, en die erg gebrande slagoffer agtergelaat. Die rowers het in die slagoffer se rooi Chevrolet-voertuig gevlug.”

Die voertuig is later verlate in die gebied gevind.

Nadat die saak aan speursers. Peter Makwela oorgegee is, is vier mans in verband met die twee huisrooftogte vasgetrek. Ngoepe sê die vier beskuldigdes is onderskeidelik in Mokopane, Hammanskraal en Zebediela in hegtenis geneem.

David Shiburi (38), Frank Tshona Baloyi (45), Peter Thebe (39) en Brian Mashakoe (30) is vandeesweek tot 30 jaar tronkstraf elk gevonnis in verband met die rooftogte. Mashakoe was al sedert 2017 agter tralies nadat hy vroeër 18 jaar tronkstraf opgelê is in verband met ʼn ander huisrooftog wat hy saam met ʼn ander groep gepleeg het.

Lt.genl. Nneke Ledwaba, provinsiale polisiekommissaris, het die vonnisse verwelkom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Regverdig

En het die slagoffer sy miljoen Rand teruggekry? En is hy vergoed vir sy pyn en lyding? En as hy nie vergoed is vir sy lyding en sy geld teruggekry het nie, is die regstelsel nie reg nie, maar verkeerd!

Rubber

Die doodstraf moet terug kom.

Christa

Hulle Moes aan hul nekke gehang het of voor vuurpeleton gesterf het. Van die 30 Jaar sit hulle 6 maande.

Griet

WELGEDAAN speursersant Makwela!

Wattie

Dankie S/Sers Makwela