Vier op plaas doodgebrand toe gepeupel toeslaan

Verskeie mense is die afgelope ruk in Mpumalanga dood nadat mense reg in eie hande geneem het. (Argieffoto ter illustrasie: Maroela Media)

Vier mans wat daarvan beskuldig is dat hulle vee probeer steel het, is in die jongste voorval van gepeupelreg in Mpumalanga dood.

Brig. Leonard Hlathi, polisiewoordvoerder, sê volgens die polisie se voorlopige inligting is die vier mans Maandag gesien terwyl hulle glo bokke by die Ga-Matimpule-nedersetting, naby Vaalbank, op ʼn bakkie gelaai het. Inwoners van die gebied het hulle na bewering probeer stuit.

“Die mans het glo tydens die oproer skote op hulle geskiet, maar hulle is eindelik deur die skare oorrompel wat hulle glo ook aangerand het.”

Volgens Hlathi is die vier mans daarna in die Isuzu-bakkie aan die brand gesteek. Hulle het verkool en kon glad nie uitgeken word nie. Die polisie is Dinsdag na die toneel ontbied en het op die liggame afgekom.

Een van die inwoners is tydens die voorval gewond en ontvang tans hospitaalbehandeling.

In nog ʼn voorval moes die polisie ʼn dag tevore ʼn 40-jarige man van ʼn woedende skare red nadat hy daarvan beskuldig is dat hy ʼn 34-jarige vrou naby Tonga aangerand het. Die man is dieselfde dag in hegtenis geneem en is onder polisiebewaking in ʼn die Tonga-hospitaal behandel.

Volgens Hlathi is hy Maandag aan sy beserings dood.

Nog twee mans verskyn Donderdag in ʼn afsonderlike saak in die Kabokweni-landdroshof op aanklag van moord nadat hulle glo verlede week ʼn jong man – wat hulle van diefstal beskuldig het – wreed vermoor het.

En in Mashishing (Lydenburg) is twee mans ook verlede week dood en nog twee in ʼn hospitaal opgeneem nadat hulle ook van misdadigheid beskuldig en aangerand is.

Genl.maj. Thulani Phahla, waarnemende polisiehoof in die provinsie, het sy diepe kommer oor die toename in voorvalle van reg in eie hande neem te kenne gegee. Hy het ook ʼn beroep op inwoners gedoen om voorvalle van misdaad by die polisie aan te meld.

“Om reg in eie hande te neem is ʼn strafbare misdaad,” sê Phahla.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Pietertjie

Gaan die gepeupel ook met ywer gearresteer word soos die Piet Retief boere?

Tiptol

Dis vreeslik wreed, maar die mense raak moedeloos want die kriminele kom weg met als.

Werner

Dis maar wat gebeur as die polisie nie hulle werk doen nie.

andre

Ek stem met van die kommentare saam. As die polisie begin om polisie te wees en hulle werk doen, en die howe begin om die reg regverdig en neutraal uit te oefen, sal dit dalk die prentjie verander.

Henk

Ja as die polisie werklik uit hulle aircon bakkies uitklim om n situasie te hanteer sal dit nie nodig wees om reg in eie hande te neem nie. Die gereg is bitter vinnig om onskuldige mense te arristeer en aan te rand maar waar was die sogenaamde POLIESIE toe mense hulle nodig gehaad het, ops ek het vergeet om te se jammer julle ons is naby aan skof ruiling of ons eet eers klaar dan kom ons ok…. wees net geduldig.